कर्नाटक राज्यात दरवर्षी रस्ते अपघातांमध्ये 11000 लोकांचा मृत्यू होतो तर 50,000 व्यक्तींना अपंगत्व प्राप्त होते. त्यामुळे वाहतुकीच्या नियमांचे पालन करण्याबरोबरच सर्वांनी वाहन चालवताना सावधगिरी बाळगणे गरजेचे आहे, असे मत कट्स इंटरनॅशनल संस्थेचे ज्येष्ठ कार्यक्रम अधिकारी मधुसूदन शर्मा यांनी व्यक्त केले.
शहरातील ईफा हॉटेलमध्ये आज शुक्रवारी पब्लिक अफेअर्स फाउंडेशन आणि कट्स इंटरनॅशनल यांच्या संयुक्त विद्यमाने रस्ते अपघातात संदर्भात एक दिवशीय कार्यशाळा पार पडली. या कार्यशाळेत शर्मा बोलत होते.
एकट्या कर्नाटकात रस्ते अपघातामुळे दरवर्षी 11 हजार लोकांना आपले प्राण गमवावे लागतात. त्याचप्रमाणे 50 हजार व्यक्तींवर कायमचे अपंगत्व पत्करून परावलंबी होण्याची पाळी येते. अपघाताच्या घटनांमुळे मृत आणि जखमींच्या कुटुंबियांनाही अनेक त्रास आणि मनस्तापाला सामोरे जावे लागते.
त्यामुळे वाहन चालवताना सर्वांनी वाहतुकीचे नियम पाळून काळजी घेणे गरजेचे आहे. वैज्ञानिक पद्धतीने बनवलेले रस्ते हे देखील अपघाताचे प्रमुख कारण आहे. त्यामुळे अपघातप्रवण क्षेत्रात अधिक सावधगिरी बाळगणे गरजेचे आहे, असे मधुसूदन शर्मा यांनी स्पष्ट केले.
त्यावेळी उपस्थित मान्यवरांपैकी अनेकांनी आपले विचार व्यक्त केले. कार्यशाळेस पब्लिक अफेअर्स फाउंडेशनच्या अन्नपूर्णा रविचंद्र, परिवहन खात्याचे मुख्य राजेंद्र कटारिया, प्रादेशिक परिवहन अधिकारी शिवानंद मगदूम, आरटीओ फेडरेशनचे अध्यक्ष अन्सार अहमद आदी उपस्थित होते.
