घरातील मंडळी बाहेर गेल्यामुळे घरात कुणी नसल्याची संधी साधून चोरट्यांनी भरदिवसा घरफोडी करून सुमारे 7 तोळे सोन्याच्या दागिन्यांसह 85 हजार रुपयांची रोकड लंपास केल्याची घटना बेनकानहळ्ळी -राकसकोप मार्गावरील केईबी ऑफिस समोर असणाऱ्या स्वराज्य कॉलनीमध्ये आज मंगळवारी दुपारी घडली.
माजी सैनिक उमेश आपटेकर यांच्या घरी हा धाडसी घरफोडीचा प्रकार पडला आहे. आपटेकर कुटुंबीय आज दुपारी मळेकरणीसाठी गेले होते. त्यामुळे स्वराज्य कॉलनीतील त्यांच्या घरामध्ये कोणीच नव्हते. ही संधी साधून चोरट्यांनी आपटेकर यांच्या घराच्या मागील दरवाज्याची कडी तोडून घरात प्रवेश केला. तसेच घरातील 7 तोळे सोन्याचे दागिने आणि 85 हजार रुपयांची रोकड लंपास केली.
चोरीला गेलेल्या सोन्याच्या दागिन्यांमध्ये दोन तोळ्याचे नेकलेस, एक व अर्ध्या तोळ्याच्या दोन अंगठ्या, एक तोळ्याची कानातील आभूषणे, दीड व दोन तोळ्याच्या दोन चेन यांचा समावेश आहे
सदर घटनेची माहिती मिळतात बेळगाव ग्रामीण पोलिसांनी तात्काळ घटनास्थळी धाव घेऊन पंचनामा करण्याबरोबरच तपास कार्य हाती घेतले आहे. उमेश आपटेकर हे सेवानिवृत्त जवान असून सध्या ते रेल्वे गेटमनचे काम करतात माजी मिस्टर इंडिया रेल्वे कोच सुनील आपटेकर यांचे ते लहान बंधू आहेत.
चोरट्यांनी उमेश आपटेकर यांचा मुलगा विनीत याने गल्ल्यात जमा केलेले 15 हजार रुपये देखील लांबविले. याप्रकरणी पोलिसात गुन्हा नोंद झाला असून पोलीस चोरांचा शोध घेत आहेत. दरम्यान आज भर दिवसा दुपारी 2 ते 4च्या दरम्यान झालेल्या या धाडसी चोरीमुळे स्वराज्य कॉलनीमध्ये घबराट पसरली आहे.
