महिला अत्याचाराच्या प्रकरणात नियमांचे उल्लंघन करणारे बेळगाव ग्रामीण पोलीस ठाण्याचे एसीपी गणपती गुडाजी यांच्यावर तात्काळ कारवाई करावी, अशी मागणी पीडित महिलेच्यावतीने जिल्हाधिकार्‍यांकडे करण्यात आली आहे.
अत्याचारग्रस्त महिलेच्यावतीने शहरासह ग्रामीण भागातील वकिलांनी उपरोक्त मागणीचे निवेदन आज गुरुवारी जिल्हाधिकारी एम. जी. हिरेमठ यांना सादर केले. निवेदनाचा स्वीकार करून जिल्हाधिकाऱ्यांनी योग्य ती कार्यवाही करण्याचे आश्वासन दिले आहे. हुंचेनट्टी (ता. बेळगाव) गावातील एका महिलेवर अत्याचार झाल्याची तक्रार गेल्या 12 सप्टेंबर रोजी बेळगाव ग्रामीण पोलीस ठाण्यात दाखल झाली आहे. पीडित महिलेला न्याय मिळवून देण्याऐवजी हे प्रकरण परस्पर मिटवण्याचा प्रयत्न एसीपी गणपती गुडाजी हे करत असल्याचे समजते.
चौकशीसाठी संबंधित महिला व आरोपीला पोलिस ठाण्यात बोलावून घेऊन सायंकाळी 4 पर्यंत गणपती गुडाजी यांनी त्यांच्या समझोता घडवून आणण्याचा प्रयत्न केला. त्यानंतर त्या दोघांना गाडीतून हुंचेनट्टी येथे आणून त्या महिलेच्या घरासमोर दोघांचे फोटो काढून घेतले. या पद्धतीने आरोपीवर कारवाई करण्याऐवजी त्या महिलेच्या चारित्र्यावर डाग लावण्याचे काम करणाऱ्या एसीपी गुडाजी यांच्या विरुद्ध कारवाई करावी, अशा आशयाचा तपशील निवेदनात नमूद आहे.
देशात महिलांवरील अत्याचाराच्या घटना वाढत आहेत. या परिस्थितीत आरोपीला पाठीशी घालण्याचे एसीपी गुणाजी यांचे कृत्य गैर आहे. वरिष्ठ पोलिस अधिकाऱ्यांनी अशा पोलिस अधिकाऱ्यावर तात्काळ कारवाई करावी, अन्यथा आंदोलन छेडले जाईल, असा इशारा ॲड. प्रवीण करोशी यांनी निवेदन सादर केल्यानंतर प्रसारमाध्यमांशी बोलताना दिला. एकंदर बेळगाव ग्रामीण पोलीस ठाण्याचे एसीपी गणपती गुडाजी यांच्यावर गंभीर आरोप ठेवण्यात आला असून ते त्याला कसे तोंड देतात हे पहावे लागणार आहे.
