आगामी काळात स्टार एअरलाइन्स बेळगाव येथून प्रादेशिक विमानसेवा वाढवणार असल्याची माहिती स्टार ग्रुप ऑफ इंडस्ट्रीचे चेअरमन संजय घोडावत यांनी बेळगाव येथे बोलताना दिली.
बेळगाव शहरातील क्लब रोडवरील रेमंड्स शोरूमला काल शुक्रवारी सायंकाळी दिलेल्या भेटीप्रसंगी ते प्रसारमाध्यमांशी बोलत होते. बेळगाव आणि संजय घोडावत ग्रुपचे जुने जिव्हाळ्याचे संबंध आहेत. विविध क्षेत्रात प्रगती केलेल्या संजय घोडावत उद्योगसमूहाने आता विमान प्रवास क्षेत्रातही भरारी घेतली आहे. स्टार एअरलाइन्सच्या माध्यमातून 77 आसनी विमान सेवा सुरू केली आहे. आता प्रादेशिक विमानसेवा वाढवण्याचा संजय घोडावत उद्योग समूहाचा मानस आहे.
घोडावत समूहाच्या लोकल मार्केट योजनेला देखील जनतेचा चांगला प्रतिसाद लाभत आहे. त्यामुळे लवकरच देशभरात 3 हजार नव्या दुकानांचा प्रारंभ करण्यात येणार आहे, अशी माहितीही संजय घोडावत यांनी यावेळी दिली.
क्लब रोडवरील रेमंड्स शोरूमला दिलेल्या भेटीप्रसंगी संजय घोडावत यांनी शॉपिंग करून विविध व्हरायटी आणि डिझाइन्सचे आपल्या आवडीचे कपडे खरेदी केले. याप्रसंगी रेमंड शोरूमचे संचालक सुरेश पोरवाल आणि विजय पोरवाल यांनी संजय घोडावत यांचे आपुलकीने स्वागत केले.
