चालकाचे नियंत्रण सुटल्याने भरधाव कारगाडी रस्त्याशेजारी झाडाला धडकून घळीत कोसळल्याने घडलेल्या अपघातात 1 जण ठार दोन युवक गंभीर जखमी झाल्याची घटना रविवारी पहाटे भुतरामहट्टी घाटात घडली.
अभिषेक सुभाष धोंगडी (वय सुमारे 19 रा. महात्मा फुले रोड शहापूर) असे अपघातात ठार झालेल्या युवकाचे नाव आहे. रविवारी पहाटे चारच्या सुमारास भरधाव कारवरील चालकाचे नियंत्रण सुटल्याने हा अपघात घडल्याची प्राथमिक माहिती उपलब्ध झाली आहे. सदर अपघातात भरधाव मारुती सुझुकी रिझ कार (क्र. केए 22 झेड 2153) झाडाला धडकून रस्त्याशेजारी खाली उतारावरील झाडीत कोसळल्यामुळे कारचे मोठे नुकसान झाले आहे.
अभिषेक धोंगडी कांही कामानिमित्त मित्रा सोबत कोल्हापूरला गेला होता, काम आटोपून पहाटे बेळगावकडे येत असताना त्याच्या कारला अपघात झाला. अपघातात गंभीर जखमी झालेल्या अभिषेकला उपचारासाठी इस्पितळातकडे नेत असताना वाटेतच त्याचा मृत्यू झाल्याचे समजते.
ओमकार बाळेकुंद्री वय 19 रा. विनायक कणेरी वय 19 रा.
रा. महात्मा फुले रोड बेळगाव अशी या अपघातात गंभीर जखमींची नावे आहेत. त्यांच्यावर खाजगी रुग्णालयात उपचार सुरू आहेत. वृत्त समजताच काकती पोलिसांनी घटनास्थळी धाव घेऊन पंचनामा केला. काकती पोलीस ठाण्यात अपघाताची नोंद झाली असून अधिक तपास सुरू आहे.
