बेळगाव लाईव्ह : विधानसभा निवडणुकीच्या पार्श्वभूमीवर काँग्रेस नेते राहुल गांधी शनिवार दि. ५ मे रोजी बेळगावात येत असून दुपारी २ वाजता यमकनमर्डी मतदारसंघातील भूतरामनहट्टी येथे होणाऱ्या भव्य प्रचार सभेत ते सहभागी होणार आहेत, अशी माहिती केपीसीसी कार्याध्यक्ष सतीश जारकीहोळी यांनी दिली.
भूतरामनहट्टी येथील कार्यक्रम स्थळाची पाहणी केल्यानंतर त्यांनी प्रसारमाध्यमांशी संवाद साधताना सांगितले की, उद्या होणाऱ्या भव्य प्रचार सभेला २५ हजार लोक उपस्थित राहतील अशी अपेक्षा आहे. एआयसीसी अध्यक्ष मल्लिकार्जुन खर्गे, राहुल गांधी, प्रियांका गांधी, सिद्धरामय्या यांच्यासह अनेक नेत्यांनी राज्यात अनेक ठिकाणी प्रचार केला आहे. गेल्या चार दिवसांत राहुल गांधींसह अनेक नेते विविध मतदार संघातील प्रचार सभांमध्ये सहभागी होत असल्याचे जारकीहोळी म्हणाले.
शनिवारी बेळगाव जिल्ह्यात केंद्रीय मंत्री अमित शहा देखील रोड शो आणि प्रचार सभा घेणार असून राज्यात भाजप सरकार येणार नाही हे जाणून पंतप्रधानदेखील रोड शो मध्ये सहभागी होऊन शेवटच्या क्षणी आपापल्या उमेदवारांना विजयी करण्यासाठी प्रयत्न करत आहेत. भाजपने कितीही प्रचार आणि रोड शो केले तरी राज्यात त्यांची सत्ता येणार नाही, असा टोला जारकीहोळी यांनी लगावला. विकासाभिमुख राजकारण करणाऱ्या काँग्रेस पक्षाला पाठिंबा देऊन सत्तेत आणण्यासाठी जनतेने तयारी सुरु केली असून आगमी निवडणुकीत काँग्रेस सत्तेवर येईल, असा विश्वास त्यांनी व्यक्त केला.
२.१५ वा. यमकनमर्डी येथे जाहीर सभा, ३.४५ वा. चिकोडी येथे जाहीर सभा, ५.३० वा सोनिया गांधी यांच्या उपस्थितीत हुबळी येथे संयुक्त सभा असा शनिवारचा राहुल गांधींचा उद्याचा बेळगाव दौरा आहे.
