बेळगाव लाईव्ह : बेळगाव येथील ‘जय किसान होलसेल व्हिजिटेबल मर्चंट्स असोसिएशन’ला कर्नाटक उच्च न्यायालयात मोठा कायदेशीर दिलासा मिळाला आहे.
एकल पीठाने दिलेल्या आदेशाला आव्हान देणारी सिद्धगौडा मोदगी आणि चुन्नप्पा पुजारी यांची याचिका उच्च न्यायालयाच्या खंडपीठाने १६ ऑक्टोबर २०२६ रोजी फेटाळल्याची माहिती असोसिएशनच्या वतीने देण्यात आली.
एकल पीठाच्या आदेशाविरोधात सिद्धगौडा मोदगी आणि चन्नप्पा पुजारी यांनी उच्च न्यायालयाच्या खंडपीठासमोर आव्हान दिले होते. या प्रकरणावर सुनावणी झाल्यानंतर खंडपीठाने संबंधित खटला फेटाळल्याने असोसिएशनसाठी हा महत्त्वाचा निकाल ठरला आहे.
या निकालामुळे असोसिएशनचे सदस्य, परवानाधारक व्यापारी आणि समर्थकांमध्ये समाधानाचे वातावरण असल्याचे असोसिएशनच्या निवेदनात म्हटले आहे. गेल्या काही काळापासून सुरू असलेल्या कायदेशीर लढाईत हा निकाल महत्त्वाचा टप्पा असल्याची भावना पदाधिकारी व सदस्यांनी व्यक्त केली.
या लढाईत सहकार्य करणारे वकील, असोसिएशनचे पदाधिकारी, सदस्य आणि समर्थक यांचे असोसिएशनच्या वतीने आभार मानण्यात आले. सर्वांनी संयम राखून आणि न्यायव्यवस्थेवर विश्वास ठेवून दिलेल्या पाठिंब्यामुळे पुढील वाटचालीस बळ मिळाल्याचेही निवेदनात नमूद करण्यात आले.
‘न्यायासाठीची लढाई एकजुटीने सुरूच राहणार’, असा निर्धार जय किसान होलसेल व्हिजिटेबल मर्चंट्स असोसिएशनच्या वतीने व्यक्त करण्यात आला.
