बेळगाव लाईव्ह : बेळगाव मधील कन्नड साहित्य भवन येथे आयोजित करण्यात आलेल्या पत्रकार परिषदेत ऊस उत्पादक शेतकरी संघटना आणि विविध शेतकरी नेत्यांच्या वतीने साखर कारखानदारीतील अडचणी आणि ऊस उत्पादक शेतकऱ्यांच्या विविध प्रलंबित मागण्यांबाबत सविस्तर भूमिका मांडण्यात आली. देशातील वाढत्या कृषी खर्चाच्या पार्श्वभूमीवर शेतकऱ्यांचे जीवनमान सुधारण्यासाठी आणि आत्महत्येचे सत्र थांबवण्यासाठी केंद्र व राज्य शासनाने तात्काळ ठोस धोरणात्मक निर्णय घ्यावेत, अशी आक्रमक मागणी या वेळी करण्यात आली.
पत्रकार परिषदेत बोलताना शेतकरी नेत्यांनी साखरेला ‘अगत्य वस्तु कायद्या’मधून (Essential Commodities Act) तातडीने वगळण्याची मागणी केली. एलपीजी गॅस, वीज आणि रस्ते कराच्या धर्तीवर साखरेसाठीही ‘द्वि-दर प्रणाली’ (Dual-pricing model) लागू करण्यात यावी. यामध्ये घरगुती वापरासाठी साखरेचा दर प्रति किलो ५० रुपये आणि व्यावसायिक वापरासाठी प्रति किलो ८० रुपये किंवा त्याहून अधिक निश्चित करावा, ज्यामुळे साखर कारखान्यांचे उत्पन्न वाढून शेतकऱ्यांना योग्य भाव मिळणे शक्य होईल, असे मत व्यक्त करण्यात आले. तसेच ऊस उत्पादक शेतकऱ्यांना एफआरपीची रक्कम देताना कारखान्यांच्या सरासरी उताऱ्याऐवजी, प्रत्येक शेतकऱ्याने पुरवठा केलेल्या उसाच्या प्रत्यक्ष उताऱ्याच्या (Recovery percentage) आधारावरच रक्कम मोजून देण्याची कायदेशीर दुरुस्ती करावी, असेही स्पष्ट करण्यात आले.
शेतीच्या वाढत्या खर्चाचा विचार करता स्वामीनाथन आयोगाच्या शिफारसीनुसार सर्वसमावेशक ‘अ२ + एफएल’ (A2 + FL) उत्पादन खर्चात ५० टक्के नफा जोडून दर निश्चित केला जावा. याशिवाय एफआरपी व्यतिरिक्त प्रति टनास १,००० रुपये ‘राज्य सल्लागार मूल्य’ (SAP) सक्तीने लागू करून शासनाने शेतकऱ्यांना आर्थिक दिलासा द्यावा, अशी मागणी करण्यात आली. यासोबतच कारखान्यांनी उत्पादित करणाऱ्या इथेनॉलचा खरेदी कोटा ३० टक्क्यांवरून ९० टक्क्यांपर्यंत वाढवून त्याचा दर प्रति लिटर ९० रुपये करावा, जेणेकरून कारखान्यांची थकबाकी कमी होऊन शेतकऱ्यांना वेळेवर बिले मिळतील.
कारखान्यांच्या वजन काट्यांवर होणारी फसवणूक रोखण्यासाठी कारखान्याबाहेर सरकारच्या थेट देखरेखीखाली स्वयंचलित डिजिटल वजन काटे बसवणे बंधनकारक करावे, तसेच ऊस कपातीच्या नावाखाली २० ते २५ टक्क्यांपर्यंत होणारी बेकायदेशीर कपात पूर्णपणे थांबवावी, असा इशाराही शेतकरी नेत्यांनी दिला.
या पत्रकार परिषदेला सुरेश परगटगावकर, राघवेंद्र नायक, वजीरप्पा बंगरगी, रमेश वाली, शिवलिंगप्पा अंगडी, सुभाष शिरापूर, वीरप्पा देसनूर, महांतेश कमत, बसगोंडा पाटील, मल्लिकार्जुन हुंबी आणि महावीर पाटील यांच्यासह विविध भागांतील शेतकरी प्रतिनिधी मोठ्या संख्येने उपस्थित होते.
