बेळगाव लाईव्ह : ऊसाला योग्य दर मिळावा, उसाचा एमएसपी (किमान आधारभूत किंमत) वाढवावा आणि साखर कारखाने तातडीने सुरू करावेत, या मागण्यांसाठी सुरू असलेल्या आंदोलनाला आता अधिक तीव्र स्वरूप देण्यात येणार आहे. केंद्रीय मंत्री प्रल्हाद जोशी यांच्यासोबत झालेल्या बैठकीत शेतकऱ्यांच्या मागण्यांवर समाधानकारक तोडगा न निघाल्याने उद्या सकाळी ११ वाजल्यापासून राष्ट्रीय महामार्ग बंद करून आंदोलन करण्याचे आवाहन शेतकरी नेते चुन्नप्पा यांनी केले आहे.
गेल्या दोन महिन्यांपासून ऊसाच्या एमएसपीमध्ये वाढ करण्याची मागणी केली जात आहे. मात्र, दरवाढीचा निर्णय घेण्यासाठी आणखी एक महिना लागेल, असे सांगितले जात आहे. दुसरीकडे, पेट्रोलियम पदार्थांच्या किमती वाढवताना कोणाचे मत विचारात घेतले होते, असा सवाल चुन्नप्पा यांनी उपस्थित केला. शेतीचा उत्पादन खर्च तिप्पट वाढला असून, ऊस उत्पादक शेतकरी मोठ्या आर्थिक संकटात सापडल्याचे त्यांनी सांगितले.
केंद्र सरकारच्या भूमिकेवर टीका करताना त्यांनी पंतप्रधान नरेंद्र मोदी आणि केंद्रीय मंत्री प्रल्हाद जोशी यांना शेतकरी कुटुंबांच्या अडचणींसाठी जबाबदार धरले. एमएसपी वाढीची घोषणा करून घेणे शक्य नसल्याचे प्रल्हाद जोशी यांनी सांगितल्याचा दावा करत, शेतकऱ्यांच्या प्रश्नांवर तोडगा काढण्याऐवजी केवळ औपचारिकता केली जात असल्याचा आरोप त्यांनी केला.
बैठकीसाठी सुमारे १०० शेतकऱ्यांना बोलावून त्यांचा अपमान करण्यात आल्याचा आरोपही चुन्नप्पा यांनी केला. शेतकऱ्यांशी सन्मानाने वागले पाहिजे, अशी मागणी त्यांनी केली. शेतकऱ्यांच्या मागण्यांना योग्य प्रतिसाद मिळत नसल्याने आपण या बैठकीला उपस्थित राहिलो नसल्याचे सांगत, शेतकऱ्यांच्या हिताविरोधात भूमिका घेणाऱ्या प्रल्हाद जोशी यांनी मंत्रिपदाचा राजीनामा द्यावा, अशी मागणीही त्यांनी केली.
राज्यात ऊस गाळप हंगाम सुरू होण्याची वेळ आली असून, पुढील चार दिवसांत साखर कारखाने सुरू करावेत, अशी मागणी करण्यात आली आहे. शेतकऱ्यांच्या समस्यांवर तातडीने तोडगा न काढल्यास कर्नाटक आणि महाराष्ट्रातील राष्ट्रीय महामार्गांवर धरणे आंदोलन करण्याबरोबरच विमानतळ बंद करण्यासाठीही आंदोलन पुकारण्याचा इशारा चुन्नप्पा यांनी दिला.
देशात साखरेची कमतरता असल्याच्या पार्श्वभूमीवर घरगुती वापरासाठीची साखर आणि व्यावसायिक वापरासाठीची साखर यांची स्वतंत्र विक्री व्यवस्था सुरू करावी, अशी सूचना शेतकरी नेत्यांनी केली आहे. तसेच, इथेनॉल उत्पादनातून मिळणारे संपूर्ण उत्पादन सरकारने खरेदी केल्यास ऊस उत्पादकांसह भात आणि मका उत्पादक शेतकऱ्यांनाही त्याचा फायदा होईल, असे मत त्यांनी व्यक्त केले.
उद्या सकाळी ११ वाजल्यापासून महामार्ग बंद आंदोलन
ऊसाच्या एमएसपीमध्ये वाढ, साखर कारखाने तातडीने सुरू करणे आणि शेतकऱ्यांच्या इतर मागण्या मान्य करणे, या मागण्यांसाठी उद्या सकाळी ११ वाजल्यापासून राष्ट्रीय महामार्ग बंद करून आंदोलन करण्यात येणार असल्याचे चुन्नप्पा यांनी जाहीर केले आहे.
