बेळगाव लाईव्ह : धावपळीच्या जीवनात एखादी मौल्यवान वस्तू हरवली की ती पुन्हा मिळेल की नाही, याची चिंता मनाला सतावत असते. विशेषतः पाकिटात रोख रक्कम आणि महत्त्वाची कागदपत्रे असतील, तर ही चिंता अधिकच वाढते. मात्र, अशा वेळी माणुसकी आणि प्रामाणिकपणावरचा विश्वास अधिक दृढ करणारी एखादी घटना घडते. बेळगावात घडलेल्या एका घटनेने याच विश्वासाला नवी उभारी दिली आहे.
बापट गल्ली येथील सुधीर मुरगोडकर यांचे पाकीट समादेवी गल्ली परिसरात हरवले होते. बेंगळूरला जाण्याच्या घाईगडबडीत त्यांचे पाकीट हरवले होते. या पाकिटात तब्बल १० हजार रुपये रोख रक्कम, आधारकार्ड, पॅनकार्ड आणि इतर महत्त्वाची मूळ कागदपत्रे होती.
हे पाकीट चव्हाट गल्ली येथील रहिवासी आणि शिवजयंती मंडळाचे अध्यक्ष अनंत (पपू) बामणे यांना सापडले. पाकिटातील पैसे स्वतःकडे ठेवण्याऐवजी त्याच्या मालकाचा शोध घेऊन ते परत करण्याचा त्यांनी निर्णय घेतला.
त्यानंतर त्यांनी निलेश शहापूरकर यांच्याशी संपर्क साधला. भाऊ किल्लेकर यांच्या मदतीने सुधीर मुरगोडकर यांच्याशी संपर्क साधण्यात आला. आवश्यक बोलणी झाल्यानंतर मुरगोडकर यांना त्यांचे हरवलेले पाकीट परत करण्यात आले. पाकिटातील १० हजार रुपये आणि सर्व महत्त्वाची मूळ कागदपत्रे सुरक्षित असल्याने त्यांना मोठा दिलासा मिळाला.
आजच्या काळात सापडलेली वस्तू परत करण्याची प्रामाणिक वृत्ती हीच समाजासाठी मोठी प्रेरणा आहे. पैशांपेक्षा माणुसकीला महत्त्व देत अनंत (पपू) बामणे यांनी दाखवलेला प्रामाणिकपणा कौतुकास्पद आहे. तसेच, हे पाकीट मूळ मालकापर्यंत पोहोचवण्यासाठी मदत करणाऱ्या निलेश शहापूरकर आणि भाऊ किल्लेकर यांचे योगदानही महत्त्वाचे ठरले.
हरवलेले पाकीट परत मिळाले, पैसे आणि कागदपत्रे सुरक्षित राहिली; पण या घटनेतून मिळालेला माणुसकीचा संदेश त्याहूनही मोलाचा आहे. समाजात आजही प्रामाणिकपणा जिवंत आहे, याची जाणीव करून देणारी ही घटना निश्चितच प्रेरणादायी आहे.