बेळगाव लाईव्ह : टिपरला मागून केएसआरटीसी बसने जोरदार धडक दिल्याने झालेल्या भीषण अपघातात बसचालकाचा जागीच मृत्यू झाला, तर १२ प्रवासी गंभीर जखमी झाले. हा अपघात बेळगाव जिल्ह्यातील हुक्केरी तालुक्यात संकेश्वरजवळ राष्ट्रीय महामार्ग क्रमांक ४८ वर घडला.
मिळालेल्या माहितीनुसार, गंगावती येथून बेळगावमार्गे कोल्हापूरकडे जाणारी ईशान्य कर्नाटक राज्य मार्ग परिवहन महामंडळाची बस संकेश्वरजवळ अपघातग्रस्त झाली.
बसने पुढे चाललेल्या टिपरला मागून धडक दिल्याने हा अपघात झाला. या दुर्घटनेत बसचालक संगप्पा तळवार यांचा जागीच मृत्यू झाला. ते गदग जिल्ह्यातील रोण तालुक्यातील सावदी गावचे रहिवासी होते.
या अपघातात १२ प्रवासी गंभीर जखमी झाले. अपघातानंतर जखमींना तातडीने संकेश्वर तालुका रुग्णालयात दाखल करून उपचार सुरू करण्यात आले.
अधिक उपचारांची आवश्यकता असलेल्या जखमींना पुढील उपचारांसाठी बेळगाव जिल्हा रुग्णालयात हलविण्यात आले.
घटनेची माहिती मिळताच संकेश्वर पोलिसांनी घटनास्थळी भेट देऊन पाहणी केली. या अपघातामुळे राष्ट्रीय महामार्गावरील वाहतुकीवर परिणाम झाला का, याबाबत अधिक माहिती उपलब्ध झालेली नाही. अपघाताचा पुढील तपास संकेश्वर पोलीस करत आहेत.
