बेळगाव लाईव्ह : पोलीस म्हटलं की डोळ्यासमोर येते ती कायदा-सुव्यवस्था, गुन्हेगारीवर नियंत्रण आणि शिस्त. मात्र, पोलीस अधिकारी समाजाशी जोडला गेला, तर खाकी वर्दीही प्रेरणेचा चेहरा बनू शकते. याच विचारातून आपल्या कार्याची वेगळी ओळख निर्माण करणारे CPI जावेद मुशाफिरी आता यमकनमरडी पोलीस ठाण्यातही सामाजिक उपक्रमांची हीच परंपरा पुढे नेत आहेत.
गणेशोत्सवाच्या पार्श्वभूमीवर यमकनमरडी पोलीस ठाण्याच्या आवारात नुकतीच शांतता बैठक घेण्यात आली. यावेळी जावेद मुशाफिरी यांनी केवळ कायदा-सुव्यवस्थेच्या सूचना देऊन बैठक संपवली नाही, तर शांततापूर्ण गणेशोत्सव साजरा करणाऱ्या मंडळांना प्रोत्साहन देण्याची नवी घोषणा केली.
2025 मध्ये कोणतीही अनुचित घटना न घडता गणेशोत्सव शांततेत पार पाडणाऱ्या सार्वजनिक गणेशोत्सव मंडळांना 5 हजार रुपये रोख बक्षीस आणि प्रशस्तीपत्र देऊन गौरविण्यात आले. यंदाही DJ चा मोठा आवाज टाळून पारंपरिक वाद्यांचा वापर करावा, पर्यावरणाचे प्रदूषण कमी करावे आणि गणेशोत्सव आनंदात व शांततेत साजरा करावा, असे आवाहन त्यांनी केले.
पण जावेद मुशाफिरी यांच्या घोषणेतील सर्वाधिक लक्षवेधी बाब म्हणजे गुणवंत विद्यार्थ्यांसाठीचे बक्षीस.
2026 च्या SSLC परीक्षेत यमकनमरडी मतदारसंघातून 625 पैकी 625 गुण मिळवणाऱ्या विद्यार्थ्याला तब्बल 1 लाख रुपयांचे रोख बक्षीस देण्यात येणार असल्याची घोषणा त्यांनी केली.
शहापुरात रुजलेला ‘पॅटर्न’, आता यमकनमरडीतही!
जावेद मुशाफिरी यांची ही सामाजिक बांधिलकी यमकनमरडीपुरती मर्यादित नाही. बेळगाव शहरातील शहापूर पोलीस स्थानकात कार्यरत असतानाही त्यांनी अशाच प्रकारच्या अभिनव उपक्रमांतून आपली वेगळी ओळख निर्माण केली होती.
गुणवंत विद्यार्थ्यांना प्रोत्साहन, सामाजिक उपक्रमांना पाठबळ आणि नागरिकांमध्ये पोलिसांबद्दल विश्वास निर्माण करण्यासाठी त्यांनी घेतलेल्या पुढाकारामुळे शहापूर परिसरात त्यांच्या कार्याची चर्चा झाली. त्यांच्या कार्यशैलीमुळे बेळगाव शहरात त्यांची ‘मॉडेल पोलीस’ आणि ‘सिंघम’ अशी ओळख निर्माण झाली होती.
आता बदलीनंतर यमकनमरडी पोलीस ठाण्यातही तोच कित्ता गिरवत, जावेद मुशाफिरी कायदा-सुव्यवस्थेसोबत सामाजिक बांधिलकी जपताना दिसत आहेत.
गणेशोत्सवात शांतता राखणाऱ्या मंडळांचा सन्मान असो किंवा 625 पैकी 625 गुण मिळवणाऱ्या विद्यार्थ्याला लाखाचे बक्षीस… खाकीच्या माध्यमातून समाजातील चांगल्या कामाला प्रोत्साहन देण्याचा त्यांचा हा प्रयत्न निश्चितच वेगळा ठरत आहे.
कारण गुन्हेगारांवर वचक ठेवणारा पोलीस अधिकारी महत्त्वाचा असतोच…
पण विद्यार्थ्यांच्या स्वप्नांना बळ देणारा आणि समाजातील चांगुलपणाला प्रोत्साहन देणारा पोलीस अधिकारी… समाजाच्या कायम लक्षात राहतो.
