बेळगाव : पडद्यावर आपल्या दमदार अभिनयाने आणि संवादफेकीने प्रेक्षकांच्या मनावर छाप पाडणारे अभिनेते सुदेश बेरी यांचा बेळगावमधील एक वेगळाच चेहरा पाहायला मिळाला. ‘शांताई वृद्धाश्रम’ला भेट देत त्यांनी तेथील आजी-आजोबांसोबत मनमोकळा संवाद साधला, हास्यविनोद केला आणि चक्क त्यांच्यासोबत जेवणही केले. या भेटीने वृद्धाश्रमातील वातावरण काही काळासाठी आनंदाने भारून गेले.
शांताई वृद्धाश्रमात सुदेश बेरी यांचे अॅलन विजय मोरे यांनी स्वागत केले. यावेळी वृद्धाश्रमातील आजींनी पारंपरिक पद्धतीने औक्षण करून त्यांचे स्वागत केले. कलाकाराच्या स्वागताचा हा साधा पण प्रेमळ क्षण उपस्थितांसाठी विशेष ठरला.
यानंतर शांताई वृद्धाश्रमचे संचालक वसंत बाळिगा यांच्या हस्ते सुदेश बेरी यांचा सत्कार करण्यात आला. त्यांच्या टीममधील सदस्यांचेही मारिया विजय मोरे आणि चेरिल मोरे यांनी स्वागत व सत्कार केला.
मात्र या भेटीतील सर्वात भावनिक क्षण होता तो सुदेश बेरी आणि वृद्धाश्रमातील रहिवाशांमधील संवादाचा. बेरी यांनी आपल्या चित्रपटांमधील काही लोकप्रिय संवाद आपल्या खास शैलीत सादर केले. त्यांचा अभिनय आणि संवाद ऐकताना आजींच्या चेहऱ्यावर उमटलेले हास्यच या भेटीची खरी पावती ठरले.
केवळ संवाद किंवा मनोरंजनापुरती भेट मर्यादित न ठेवता बेरी यांनी प्रत्येकाशी वैयक्तिकरित्या संवाद साधला. त्यांच्या आयुष्याबद्दल जाणून घेतले, गप्पा मारल्या आणि काही क्षण त्यांच्यासोबत अगदी घरच्यांसारखे घालवले.
दिवसभराच्या या भेटीचा शेवटही तितकाच हृदयस्पर्शी झाला. सुदेश बेरी यांनी वृद्धाश्रमातील सर्व रहिवाशांसोबत एकत्र जेवण केले. स्टार आणि चाहत्यांमधील अंतर नाही, तर माणूस आणि माणसामधील आपुलकी अनुभवायला मिळावी, असा हा क्षण होता.
“दुसरं बालपण” जगणाऱ्या या आजी-आजोबांसाठी सुदेश बेरींची भेट म्हणजे केवळ एका अभिनेत्याची भेट नव्हती; तर काही तासांसाठी त्यांच्या आयुष्यात आलेला आनंदाचा, आपुलकीचा आणि आठवणींचा एक सुंदर क्षण होता.
शांताई वृद्धाश्रमातील या भेटीत संवाद होते, हास्य होते, आठवणी होत्या आणि सर्वात महत्त्वाचे म्हणजे माणुसकीचा स्पर्श होता.
