जिद्दीतून ऑन्कोसर्जरीकडे डॉ. प्रणव अध्यापकची झेप

बेळगाव लाईव्ह विशेष : स्वप्न मोठे असेल, तर त्यासाठी मेहनतीची तयारीही तितकीच मोठी असावी लागते. वैद्यकीय क्षेत्रातील अत्यंत कठीण मानल्या जाणाऱ्या प्रवासात जिद्द, सातत्य आणि कुटुंबाचा भक्कम पाठिंबा असेल, तर कोणतेही ध्येय गाठता येते, याचे प्रेरणादायी उदाहरण म्हणजे डॉ. प्रणव अध्यापक.

बेळगावचे ज्येष्ठ पत्रकार विलास अध्यापक यांचे चिरंजीव असलेल्या डॉ. प्रणव यांनी NEET Super Speciality परीक्षेत देशपातळीवर 655 वा क्रमांक मिळवत ऑन्कोसर्जरीच्या पुढील शिक्षणासाठी आपली वाटचाल निश्चित केली आहे. स्टेट कॅन्सर इन्स्टिट्यूट, गव्हर्मेंट मेडिकल कॉलेज, छत्रपती संभाजीनगर येथे ऑन्कोसर्जरीमध्ये उच्च शिक्षणासाठी त्यांची निवड झाली आहे.

ही केवळ एका विद्यार्थ्याच्या यशाची कहाणी नाही; तर कामाच्या जबाबदाऱ्या सांभाळत, कठीण परीक्षा देत आणि वैद्यकीय क्षेत्रातील आव्हाने स्वीकारत ध्येय गाठण्याची प्रेरणादायी कहाणी आहे.

शाळेपासून वैद्यकीय शिक्षणापर्यंत…

डॉ. प्रणव यांचे शालेय शिक्षण सेंट पॉल्स हायस्कूल, बेळगाव येथे झाले. बारावीपर्यंतचे शिक्षण त्यांनी जी. एस. एस. कॉलेजमध्ये पूर्ण केले. त्यानंतर जे. एन. मेडिकल कॉलेजमधून एमबीबीएसचे शिक्षण पूर्ण केले.

पदव्युत्तर शिक्षणासाठी त्यांनी सर्जरीची वाट निवडली आणि लातूर येथील विलासराव देशमुख शासकीय वैद्यकीय महाविद्यालयातून एम.एस. (जनरल सर्जरी) पूर्ण केले.

वैद्यकीय शिक्षणाचा अत्यंत व्यस्त प्रवास सुरू असतानाही त्यांनी आपल्या इतर आवडी जपल्या. गायन, वक्तृत्व आणि लेखन या छंदांनाही त्यांनी वेळ दिला. त्यामुळे वैद्यकीय क्षेत्रातील अभ्यासासोबतच व्यक्तिमत्त्व विकासाचीही त्यांनी वाटचाल सुरू ठेवली.

NEET Super Speciality… काम करता करता अभ्यास!

NEET Super Speciality ही परीक्षा वैद्यकीय क्षेत्रातील अत्यंत स्पर्धात्मक परीक्षा मानली जाते. या परीक्षेची तयारी करताना डॉ. प्रणव यांच्यासमोर अभ्यासासोबत हॉस्पिटलमधील जबाबदाऱ्यांचेही मोठे आव्हान होते.

इमर्जन्सी ड्युटी, रुग्णसेवा आणि रात्री उशिरापर्यंत सुरू असलेली ऑपरेशन्स यामधून वेळ काढत त्यांनी परीक्षेची तयारी केली.

परीक्षेच्या आदल्या दिवशी रात्री उशिरापर्यंत ऑपरेशनमध्ये व्यस्त असतानाही दुसऱ्या दिवशी परीक्षेला सामोरे जाण्याची जिद्द त्यांनी दाखवली. काम करता करता अभ्यास आणि त्यातून मिळालेले 655 वे स्थान, हे त्यांच्या मेहनतीचे आणि चिकाटीचे प्रतीक आहे.

त्यांच्या मते, “Hard work beats talent if talent doesn’t work hard.” प्रामाणिक आणि सातत्यपूर्ण प्रयत्न केले, तर अपेक्षित परिणाम मिळतो, हा त्यांचा ठाम विश्वास आहे.

ऑन्कोसर्जरीची निवड का?

कर्करोगाचे नाव ऐकले की आजही अनेकांच्या मनात भीती निर्माण होते. मात्र कर्करोगाचे वेळेत निदान झाल्यास आधुनिक वैद्यकशास्त्रातील शस्त्रक्रिया, केमोथेरपी आणि रेडिएशन यांसारख्या उपचारांच्या माध्यमातून अनेक रुग्णांना उपचाराची संधी मिळू शकते, हे डॉ. प्रणव यांनी पदव्युत्तर शिक्षणादरम्यान जवळून पाहिले.

ऑन्कोसर्जरीमध्ये शरीराच्या विविध भागांतील कर्करोगांवर गुंतागुंतीच्या शस्त्रक्रिया कराव्या लागतात. अनेकदा या शस्त्रक्रिया 10 ते 11 तास किंवा त्याहून अधिक काळ चालू शकतात.

या आव्हानात्मक क्षेत्रात काम करण्याची त्यांची पूर्वीपासूनच इच्छा होती. त्यामुळे त्यांनी ऑन्कोसर्जरीमध्ये सुपर स्पेशलायझेशन करण्याचा निर्णय घेतला.

आई-वडिलांचा विश्वास… यशामागची मोठी ताकद

डॉ. प्रणव यांच्या यशामागे त्यांच्या स्वतःच्या मेहनतीसोबतच आई-वडिलांचा विश्वास आणि पाठिंबा अत्यंत महत्त्वाचा आहे.

वैद्यकीय क्षेत्राची पार्श्वभूमी नसतानाही विलास अध्यापक आणि त्यांच्या कुटुंबाने प्रणव यांच्या निर्णयावर पूर्ण विश्वास ठेवला. वैद्यकीय शिक्षणाची वाट निवडताना “तू शंभर टक्के तयार असशील, तरच ही जोखीम घे”, असा सल्ला देत त्यांनी मुलाच्या निर्णयाला पाठबळ दिले.

डॉ. प्रणव यांच्या शब्दांत सांगायचे तर, त्यांच्या यशात आई-वडिलांना 100 पैकी 100 पेक्षा अधिक गुण द्यावे लागतील. कारण त्यांनी घेतलेल्या मेहनतीपेक्षा पालकांनी त्यांच्यावर ठेवलेला विश्वास आणि दिलेले पाठबळ तितकेच मोठे आहे.

कॅन्सरविषयी भीती नाही, जनजागृती हवी!

डॉ. प्रणव यांच्या ऑन्कोसर्जरीच्या प्रवासामागे केवळ करिअरचे ध्येय नाही, तर सामाजिक बांधिलकीची भावना देखील आहे.

वेळेत निदान न झाल्याने किंवा भीतीपोटी आजार लपवल्याने अनेक रुग्णांना उपचाराची योग्य संधी मिळत नाही. त्यामुळे कर्करोगाबाबतची भीती कमी करून त्याच्या लवकर निदानाबाबत जनजागृती करणे, हा त्यांचा महत्त्वाचा संकल्प आहे.

बेळगाव आणि परिसरातील ग्रामीण भागातील लोकांपर्यंत पोहोचून कर्करोगाची लक्षणे, लवकर निदानाचे महत्त्व आणि उपलब्ध उपचार याबाबत जनजागृती करण्याची त्यांची इच्छा आहे.

विद्यार्थ्यांसाठी काय संदेश?

दहावी-बारावीतील विद्यार्थ्यांना डॉ. प्रणव यांचा संदेशही महत्त्वाचा आहे. पालकांनी आपल्या मुलांची आवड आणि क्षमता समजून घेऊन त्यांना योग्य मार्गदर्शन करावे. मुलांनीही आपल्या मनातील विचार, आवडी आणि अडचणी पालकांशी मोकळेपणाने बोलाव्यात, असे ते सांगतात.

त्यांच्या स्वतःच्या प्रवासातून एक गोष्ट स्पष्ट होते—ध्येय निश्चित असेल, प्रामाणिक मेहनत करण्याची तयारी असेल आणि कुटुंबाचा विश्वास असेल, तर परिस्थिती कितीही कठीण असली तरी यशाचा मार्ग नक्की सापडतो.

बेळगावशी नाळ कायम…

बेळगावच्या मातीत वाढलेल्या डॉ. प्रणव यांना आपल्या शहरासाठी आणि समाजासाठी काम करण्याची विशेष इच्छा आहे. वैद्यकीय क्षेत्रातील ज्ञानाचा उपयोग समाजाच्या हितासाठी करण्याचा त्यांचा संकल्प आहे.

एका बाजूला पत्रकारितेच्या माध्यमातून समाजाच्या प्रश्नांना वाचा फोडणारे ज्येष्ठ पत्रकार विलास अध्यापक, तर दुसऱ्या बाजूला शस्त्रक्रियेच्या माध्यमातून रुग्णांना नवजीवन देण्याच्या दिशेने वाटचाल करणारे त्यांचे चिरंजीव डॉ. प्रणव अध्यापक—या दोघांचा प्रवास बेळगावच्या सामाजिक आणि वैद्यकीय क्षेत्रासाठी निश्चितच प्रेरणादायी आहे.

NEET Super Speciality मध्ये 655 वा क्रमांक, ऑन्कोसर्जरीतील पुढील शिक्षणासाठी निवड आणि समाजसेवेची जिद्द—डॉ. प्रणव अध्यापक यांच्या या प्रवासाला टीम बेळगाव लाईव्हच्या मनःपूर्वक शुभेच्छा!

बेळगाव लाईव्ह आणि संयुक्त महाराष्ट्र पत्रकार संघातर्फे सन्मान

डॉ. प्रणव अध्यापक यांच्या या उल्लेखनीय यशाबद्दल टीम बेळगाव लाईव्ह आणि संयुक्त महाराष्ट्र पत्रकार संघाचे उपाध्यक्ष प्रकाश बेळगोजी यांच्या हस्ते त्यांचा विशेष सन्मान करण्यात आला.

यावेळी ज्येष्ठ साहित्यिक गुणवंत पाटील, ज्येष्ठ पत्रकार प्रसाद प्रभू, समितीचे युवा कार्यकर्ते सागर पाटील, बेळगाव लाईव्हचे संजय चौगुले तसेच ज्येष्ठ पत्रकार विलास अध्यापक उपस्थित होते.

वैद्यकीय क्षेत्रात बेळगावचे नाव उज्ज्वल करणाऱ्या डॉ. प्रणव यांच्या यशाचे उपस्थितांनी कौतुक करत, त्यांच्या पुढील ऑन्कोसर्जरीच्या प्रवासासाठी शुभेच्छा दिल्या. वैद्यकीय क्षेत्रातील हे यश केवळ त्यांच्या कुटुंबासाठीच नव्हे, तर बेळगावच्या शैक्षणिक आणि सामाजिक क्षेत्रासाठीही अभिमानाची बाब असल्याची भावना यावेळी व्यक्त करण्यात आली.