बेळगाव लाईव्ह :बेळगावमधील सिटीज 2.0 प्रकल्पाच्या अंमलबजावणीला आणखी एक फटका बसला आहे. ‘स्मार्ट सिटी’ विभागाने तयार केलेल्या अंतिम प्रस्तावातील तीन महत्त्वाचे प्रकल्प केंद्र सरकारने फेटाळले आहेत. या निर्णयामुळे शहरी पायाभूत सुविधा आणि घनकचरा व्यवस्थापन योजनेच्या अंमलबजावणीस आणखी विलंब होण्याची शक्यता आहे.
सिटीज 2.0 प्रकल्पासंदर्भात सोमवारी झालेल्या आढावा बैठकीत हा मुद्दा चर्चेला आला. या बैठकीला महानगरपालिका आयुक्त कार्तिक एम., स्मार्ट सिटीच्या व्यवस्थापकीय संचालक कविता वारंगळ, अधीक्षक अभियंता लक्ष्मी निपाणीकर, सहाय्यक कार्यकारी अभियंता हनुमंत कलादगी आणि इतर अधिकारी उपस्थित होते.
बैठकीदरम्यान अधिकाऱ्यांनी स्पष्ट केले की, सिटीज 2.0 प्रस्तावातील तीन प्रकल्पांना केंद्राची मंजुरी मिळाली नाही. परिणामी, स्मार्ट सिटी विभागाने बेळगाव महानगरपालिकेला शहराच्या सध्याच्या गरजांनुसार तीन पर्यायी प्रकल्प निश्चित करून प्रस्तावित करण्यास सांगितले आहे. सिटीज 2.0 कार्यक्रमासाठी बेळगावची 5-सूत्री योजना तयार करण्याची तयारी सुरू असून महानगरपालिका पर्यायी प्रकल्प निश्चित करेल, तेंव्हा त्यांचा सुधारित सिटीज 2.0 प्रस्तावात समावेश केला जाईल. त्यानंतर, ही अद्ययावत योजना कर्नाटक सरकारमार्फत केंद्र सरकारकडे मंजुरीसाठी पुन्हा सादर केली जाईल.
या ताज्या घडामोडीमुळे ‘सिटीज 2.0’ च्या अंमलबजावणीच्या वेळापत्रकात विलंब होण्याची शक्यता असून या योजनेला निधी मंजुरी आणि प्रकल्पाच्या अंतिम निश्चितीबाबत यापूर्वीच विलंब झाला आहे.
याआधी बेळगाव महानगरपालिकेने या योजनेसाठी प्राथमिक तयारी सुरू केली होती आणि शहरासाठी प्रस्तावित असलेल्या वैज्ञानिक घनकचरा व्यवस्थापन प्रणालीचा एक महत्त्वाचा भाग असलेल्या तीन ‘दुय्यम परिवहन स्थानकां’साठी (एसटीएस) जागा निश्चित केल्या होत्या. महानगरपालिकेने या प्रकल्पासाठी आपला आर्थिक वाटा देण्यास मंजुरी देऊन अंतिम आराखडा मंजुरीसाठी सादर केला होता. मात्र, केंद्र सरकारने तीन प्रकल्प फेटाळल्यामुळे, आता अंमलबजावणीची प्रक्रिया पुढे नेण्यापूर्वी या योजनेत सुधारणा करावी लागणार आहे.