बेळगाव लाईव्ह : गेल्या काही महिन्यांपासून पाणीटंचाईचा सामना करणाऱ्या बेळगाव शहरासाठी आता दिलासादायक चित्र निर्माण झाले आहे. सततच्या पावसामुळे शहराला पाणीपुरवठा करणाऱ्या राकसकोप धरणातील पाणीसाठ्यात मोठी वाढ झाली असून धरण पूर्ण क्षमतेच्या जवळ पोहोचले आहे.
यंदा पावसाला झालेल्या विलंबामुळे उन्हाळ्याच्या अखेरीस राकसकोप धरणातील पाणीसाठा मोठ्या प्रमाणात घटला होता. मे महिन्यात धरणातील साठा अत्यल्प पातळीवर पोहोचल्याने बेळगाव शहरावर पाणी संकट निर्माण झाले होते. त्यावेळी राकसकोप धरणातील उपलब्ध पाणी केवळ १० ते १५ दिवस पुरेल अशी परिस्थिती निर्माण झाली होती. बेळगाव शहराची दररोजची पाण्याची गरज सुमारे 130 ते 135 दशलक्ष लिटर इतकी आहे. शहराच्या पाणीपुरवठ्यासाठी राकसकोप आणि हिडकल या दोन्ही जलस्रोतांवर मोठ्या प्रमाणात अवलंबून राहावे लागते.
सध्या झालेल्या पावसामुळे मार्कंडेय नदी आणि जांबूळा कालव्यातून धरणात मोठ्या प्रमाणात पाण्याची आवक होत आहे. २७ जुलै रोजी राकसकोप धरणाची पाणीपातळी 2470.3 फूट नोंदवण्यात आली होती, तर पूर्ण क्षमतेची पातळी 2477 फूट आहे. त्यामुळे धरण भरण्यासाठी अजून काही फूट पाण्याची गरज आहे.
धरण पूर्ण क्षमतेने भरल्यास बेळगाव शहराच्या पाणीपुरवठ्याला मोठा आधार मिळणार आहे. उपलब्ध क्षमतेचा विचार करता, धरण पूर्ण भरल्यानंतर पावसाळ्यानंतरच्या काळात शहराला काही महिन्यांसाठी पुरेसा साठा उपलब्ध होऊ शकतो. मात्र, उन्हाळ्यातील बाष्पीभवन, पाण्याचा वापर आणि हिडकल धरणातून होणारा पुरवठा यावर हा कालावधी अवलंबून राहणार आहे.
दरम्यान, पावसाचा जोर कायम राहिल्यास राकसकोप धरण ओव्हरफ्लो होण्याची शक्यता व्यक्त केली जात आहे. मात्र, धरणाचे दरवाजे उघडण्याबाबत प्रशासनाकडून अद्याप अधिकृत घोषणा करण्यात आलेली नाही. एकीकडे काही आठवड्यांपूर्वी पाण्यासाठी संघर्ष करणारे बेळगाव शहर आता धरण भरण्याची प्रतीक्षा करत आहे. त्यामुळे राकसकोप धरणातील वाढता पाणीसाठा शहरवासीयांसाठी मोठा दिलासा ठरत आहे.
