बेळगाव लाईव्ह : काँग्रेस रोडवरील मिलिटरी महादेव मंदिरासमोरील उड्डाणपुलाखाली असलेल्या नाल्याच्या प्रवेशद्वारात मोठ्या प्रमाणात प्लास्टिक कचरा अडकून पाण्याचा नैसर्गिक प्रवाह रोखला गेल्याची गंभीर बाब समोर आली आहे. सतत पडणाऱ्या पावसाच्या पार्श्वभूमीवर हा अडथळा तातडीने दूर न केल्यास परिसरात पाणी तुंबून पूरसदृश परिस्थिती निर्माण होण्याची भीती व्यक्त केली जात आहे.
शुक्रवार, १० जुलै २०२६ रोजी सकाळी ८ वाजण्याच्या सुमारास ही बाब संबंधित प्रशासनाच्या निदर्शनास आणून देण्यात आली. मात्र बातमी लिहिपर्यंत नाल्यातील प्लास्टिक कचरा हटविण्याबाबत कोणतीही ठोस कारवाई झालेली नसल्याचा आरोप करण्यात आला आहे.
नाल्याच्या प्रवेशद्वारात अडकलेल्या प्लास्टिक कचऱ्यामुळे पावसाचे पाणी पुढे जाऊ शकत नसल्याने पाणी साचण्यास सुरुवात होण्याची शक्यता आहे. आगामी काळात मुसळधार पाऊस झाल्यास मराठा कॉलनी, नानावाडी आणि विवेकानंद कॉलनी या भागांमध्ये पाणी शिरून नागरिकांना मोठा फटका बसू शकतो, असा इशाराही देण्यात आला आहे.
या संदर्भात माजी सैनिक सुधाकर चाळके आणि माजी सैनिक मनोहर पाटील यांनी प्रशासनाला तातडीचा इशारा देत नाल्यातील प्लास्टिक कचरा त्वरित हटवून पाण्याचा प्रवाह सुरळीत करण्याची मागणी केली आहे. पावसाळ्यात अशा प्रकारे नाले कचऱ्याने तुंबणे ही गंभीर बाब असून, वेळेत उपाययोजना न झाल्यास मोठे नुकसान होऊ शकते, असे त्यांनी नमूद केले.
स्थानिक नागरिकांनीही महानगरपालिकेने पावसाळ्यात नाले आणि गटारांची नियमित स्वच्छता करून अशा धोकादायक परिस्थिती टाळावी, अशी मागणी केली आहे. संभाव्य पूरस्थिती टाळण्यासाठी प्रशासनाने तातडीने घटनास्थळी पाहणी करून आवश्यक उपाययोजना कराव्यात, अशी अपेक्षा परिसरातील नागरिक व्यक्त करत आहेत.