बेळगाव लाईव्ह :अनेक महिन्यांच्या विलंबानंतर बेळगाव महानगरपालिकेने जन्म आणि मृत्यू दाखले विभागासाठी अत्यंत अपेक्षित असलेल्या ‘हेल्प डेस्क’चे आणि अर्ज स्वीकारण्याच्या कक्षाचा (काउंटर) अखेर शुभारंभ केला आहे. महापौर प्रीती कामकर आणि आमदार आसिफ (राजू) सेठ यांच्या हस्ते गुरुवारी या सुविधेचे उद्घाटन करण्यात आले.
सदर कार्यक्रमास उपमहापौर हनुमंत कोंगाली, महापालिका आयुक्त कार्तिक एम., सत्ताधारी पक्षनेते संतोष पेडणेकर यांच्यासह नगरसेवक आणि अधिकारी उपस्थित होते. महापालिकेच्या मुख्य कार्यालयातील जन्म आणि मृत्यू दाखले विभागांतर्गत हे हेल्प डेस्क सुरू करण्यात आले आहे.
यासाठी आवश्यक पायाभूत सुविधा बऱ्याच काळापूर्वीच सज्ज होत्या आणि 1 एप्रिलपासून हे डेस्क सुरू करण्याची घोषणाही करण्यात आली होती; मात्र, ते सुरू करण्यास विलंब केला जात असल्यामुळे नागरिकांकडून टीका होत होती. हे हेल्प डेस्क नागरिकांना जन्म-मृत्यू नोंदणी, दाखल्यांमधील दुरुस्ती, नांव बदलणे आणि आवश्यक कागदपत्रे यांबाबत मार्गदर्शन करेल. यासाठी एक स्वतंत्र अर्ज स्वीकारण्याचा कक्षही सुरू करण्यात आला आहे.
महापालिकेत यापूर्वी कागदपत्रांची कमतरता किंवा त्रुटींमुळे अनेक अर्ज फेटाळले जात किंवा प्रलंबित राहत असत, ज्यामुळे अर्जदारांना वारंवार फेऱ्या माराव्या लागत होत्या. नवीन प्रणालीनुसार अर्ज स्वीकारण्यापूर्वी हेल्प डेस्कवर त्यांची पडताळणी केली जाईल.
अपूर्ण अर्ज योग्य मार्गदर्शनासह त्वरित परत केले जातील, तर पूर्ण अर्ज स्वीकारून पुढील प्रक्रियेसाठी पाठवले जातील. या नवीन व्यवस्थेमुळे विलंब कमी होईल, नागरिकांना वारंवार फेऱ्या मारण्याची गरज भासणार नाही आणि दाखले देण्याची प्रक्रिया अधिक जलद व नागरिक-स्नेही होईल, अशी अपेक्षा आहे.