बेळगाव लाईव्ह : कर्नाटक राज्य विधानमंडळाचे पावसाळी अधिवेशन यंदा प्रथमच बेळगाव येथील सुवर्ण विधान सौध येथे होण्याची शक्यता व्यक्त होत असून, जिल्हा प्रशासनाने त्यादृष्टीने प्राथमिक तयारीला सुरुवात केली आहे. पारंपरिक हिवाळी अधिवेशनाऐवजी यंदा जुलै किंवा ऑगस्ट महिन्यात अधिवेशन होण्याची शक्यता असल्याने विविध विभागांमध्ये समन्वय बैठका सुरू झाल्या आहेत.
प्राथमिक माहितीनुसार हे अधिवेशन जुलैच्या पहिल्या किंवा दुसऱ्या आठवड्यात होण्याची शक्यता असून ते सुमारे दहा दिवस चालू शकते. या पार्श्वभूमीवर राज्यभरातून येणारे आमदार, विधान परिषद सदस्य, वरिष्ठ अधिकारी, राजकीय पक्षांचे पदाधिकारी आणि पोलीस कर्मचारी अशा सुमारे पाच हजारांहून अधिक व्यक्तींच्या निवास व वाहतुकीचे नियोजन प्रशासनाने हाती घेतले आहे.
जिल्हाधिकाऱ्यांच्या अध्यक्षतेखाली नुकत्याच झालेल्या बैठकीत निवास व्यवस्थेवर विशेष भर देण्यात आला. शहरातील हॉटेल्स, लॉजेस, गेस्ट हाऊसेस आणि निवासी अपार्टमेंटमधील खोल्यांच्या आगाऊ आरक्षणाबाबत चर्चा करण्यात आली. तसेच विश्वेश्वरैया तंत्रज्ञान विद्यापीठ, वन विभाग आणि सार्वजनिक बांधकाम विभागाच्या विश्रामगृहांमध्येही विशेष व्यवस्था करण्याचा विचार सुरू आहे. पंचतारांकित हॉटेल्सपासून सामान्य निवास सुविधांपर्यंत उपलब्ध खोल्यांचाही आढावा बैठकीत घेण्यात आला.
या संभाव्य अधिवेशनात उत्तर कर्नाटकातील सिंचन प्रकल्प, प्रादेशिक विकास, तसेच कित्तूर कर्नाटक आणि कल्याण कर्नाटक भागांसाठी विशेष निधीच्या मागण्या यांसारखे महत्त्वाचे विषय चर्चेत येण्याची शक्यता आहे.
दरम्यान, पावसाळी अधिवेशनामुळे प्रशासनासमोर काही नवीन आव्हानेही उभी राहण्याची शक्यता आहे. मुसळधार पावसामुळे वाहतूक आणि निवास व्यवस्थापन अधिक काळजीपूर्वक करावे लागणार आहे.
इंधन दरवाढीमुळे वाहन भाडे वाढण्याची शक्यता असून, हॉटेलमधील निवास आणि भोजन खर्चातही वाढ होण्याची शक्यता वर्तवली जात आहे. त्यामुळे या अधिवेशनाचे व्यवस्थापन प्रशासनासाठी अधिक खर्चिक ठरू शकते.
जिल्हाधिकारी मोहम्मद रोशन यांनी सांगितले की, सरकारकडून अद्याप अधिकृत घोषणा झालेली नसली तरी तयारीसंदर्भात सूचना मिळाल्यानंतर प्रशासनाने हालचाली सुरू केल्या आहेत. “पहिल्या टप्प्यातील आवश्यक व्यवस्थेची पाहणी करण्यात आली असून मिळालेल्या निर्देशांवरून अधिवेशन होण्याची शक्यता दाट आहे,” असे त्यांनी स्पष्ट केले.
दरवर्षी डिसेंबरमध्ये होणाऱ्या हिवाळी अधिवेशनामुळे लग्नसराईच्या हंगामात बेळगावमध्ये हॉटेल आरक्षणाची मोठी समस्या निर्माण होत असे. अनेकांचे आरक्षण रद्द होणे किंवा खोल्या उपलब्ध न होणे अशा तक्रारी पुढे येत होत्या. यंदा अधिवेशन पावसाळ्यात होण्याची शक्यता असल्याने त्या अडचणी काही प्रमाणात कमी होण्याची शक्यता आहे. मात्र त्याचवेळी पावसाळ्यामुळे निर्माण होणाऱ्या नव्या व्यवस्थापकीय आव्हानांनाही प्रशासनाला सामोरे जावे लागणार आहे.
