बेळगाव लाईव्ह : फेसबुकवरून ओळख झालेल्या एका कथित परदेशी महिलेने प्रेमाचे नाटक रचत तब्बल ७.०५ लाख रुपयांची फसवणूक केल्याची घटना उघडकीस आली आहे. यरगट्टी तालुक्यातील कुरुबगट्टी गावातील लक्कप्पा सन्निंगनवर हे या सायबर फसवणुकीचे बळी ठरले आहेत.
काही महिन्यांपूर्वी ‘रोसांजेल पाझ’ नावाच्या फेसबुक खात्यावरून लक्कप्पा यांना फ्रेंड रिक्वेस्ट आली होती. त्यांनी ती स्वीकारल्यानंतर दोघांमध्ये संवाद सुरू झाला. सुरुवातीला साध्या गप्पा होत असल्या तरी नंतर व्हॉट्सॲप कॉल आणि संदेशांद्वारे सातत्याने संपर्क वाढवण्यात आला. संबंधित महिलेने स्वतःला परदेशात राहणारी महिला असल्याचे सांगितले.
काळाच्या ओघात दोघांमध्ये भावनिक जवळीक निर्माण झाली. त्यानंतर महिलेने आपण लक्कप्पांवर प्रेम करत असल्याचा विश्वास निर्माण केला. पुढे भारतात येणे शक्य नसल्याने प्रेमाची आठवण म्हणून ८० हजार पाउंड (सुमारे १.०३ कोटी रुपये) किमतीचे गिफ्ट, रोख रक्कम आणि मौल्यवान वस्तू पार्सलद्वारे पाठविल्याचे सांगितले.
काही दिवसांनी संबंधित पार्सल भारतात पोहोचल्याचे सांगून ते सोडवून घेण्यासाठी विविध शुल्क भरावे लागतील, अशी माहिती देण्यात आली. पार्सल क्लिअरन्स शुल्क, मनी लाँडरिंग प्रमाणपत्र शुल्क, आयकर, कस्टम क्लिअरन्स आदी कारणे सांगून टप्प्याटप्प्याने पैशांची मागणी करण्यात आली.
महिलेच्या बोलण्यावर विश्वास ठेवून लक्कप्पा यांनी १७ एप्रिल ते २२ मे या कालावधीत विविध बँक खात्यांमध्ये एकूण ७.०५ लाख रुपये जमा केले. मात्र पैसे भरूनही पार्सल मिळाले नाही. उलट आणखी पैशांची मागणी होत असल्याने त्यांना संशय आला. चौकशी केल्यानंतर आपण सायबर फसवणुकीचे शिकार झाल्याचे त्यांच्या लक्षात आले.
याप्रकरणी लक्कप्पा सन्निंगनवर यांनी जिल्हा सीईएन (Cyber Economic and Narcotics) पोलीस ठाण्यात तक्रार दाखल केली आहे. पोलिसांनी गुन्हा नोंद करून तपास सुरू केला असून फसवणुकीसाठी वापरलेली बँक खाती, मोबाईल क्रमांक आणि सोशल मीडिया खाती यांची माहिती गोळा केली जात आहे.
पोलिसांचे आवाहन
सोशल मीडियावर अपरिचित व्यक्तींशी अतिजवळीक साधणे, परदेशातून भेटवस्तू किंवा पैसे पाठविल्याचे सांगून विविध शुल्कांच्या नावाखाली पैसे मागणे ही सायबर गुन्हेगारांची सामान्य युक्ती आहे. अशा प्रकारचे संदेश आल्यास कोणत्याही परिस्थितीत पैसे पाठवू नयेत. संशयास्पद प्रकार आढळल्यास त्वरित सायबर हेल्पलाइन १९३० किंवा जवळच्या पोलीस ठाण्याशी संपर्क साधावा, असे आवाहन पोलिसांनी केले आहे.
