बेळगाव शहरातील विविध रस्त्यांची दुरवस्था आणि विकासाच्या नांवाखाली करण्यात येत असलेल्या खोदाईमुळे अडथळा निर्माण झालेला असताना आता शहरातील अर्ध्याहून अधिक पथदीप आणि हायमास्ट बंद पडल्याने वाहनचालकांच्या समस्येत भर पडली आहे.
शहर स्मार्ट बनविण्यासाठी कोट्यावधी रुपयांचा चुराडा केला जात आहे. तथापि नागरिकांसाठी आवश्यक असलेल्या सुविधा पुरविण्याकडे जिल्हा प्रशासन आणि महापालिकेचे दुर्लक्ष झाले आहे. पथदीप देखभालीच्या नांवाखाली वर्षाला 4 कोटी रुपयांहून अधिक निधी खर्च केला जातो. तथापी खर्च केलेल्या निधीच्या तुलनेत पथदीप त्यांची देखभाल केली जात नसल्याचे निदर्शनास आले आहे. देखभालीअभावी सध्या शहर व उपनगरातील निम्मे पथदीप बंदच आहेत.
विशेषतः डॉ. बाबासाहेब आंबेडकर रोड, क्लब रोड, कॉलेज रोड, महाद्वार रोड, एसपीएम रोड, महात्मा फुले रोड, गोवावेस सर्कल ते नाथ पै चौक, विजयनगर, सह्याद्रीनगर रोड आदी विविध भागातील पथदीप सध्या बंद आहे. त्याचप्रमाणे गोवावेस सर्कल, मिलिटरी विनायक मंदिरामागील विजयनगर, हनुमाननगर चौक, खंजर गल्ली, टिळक चौक अशा विविध ठिकाणचे हायमास्ट दिवे बंद अवस्थेत आहेत. शहरातील हायमास्ट दुरुस्त करण्यासाठी एस्टिमेट तयार करण्यात आले असले तरी महापालिकेकडे निधी नसल्याने हायमास्ट दुरुस्तीकडे कानाडोळा करण्यात येत असल्याचे समजते.
शहरातील पथदीप दुरुस्त करण्यात यावेत अशी मागणी वारंवार करून देखील त्याकडे दुर्लक्ष केले जात आहे. शहरातील बऱ्याच रस्त्यांची दुरावस्था झाली आहे. त्याचप्रमाणे विकासाच्या नांवाखाली ठिकाणी रस्त्यावर खोदाई करण्यात आली आहे. या पद्धतीने खाचखळग्यांनी भरलेल्या आणि खोदलेल्या रस्त्यांवर पथदिपांअभावी अपघाताचा धोका वाढला आहे. तरी लोकप्रतिनिधींसह वरिष्ठ अधिकाऱ्यांनी याकडे गांभीर्याने लक्ष देऊन मनपाच्या संबंधीत अधिकाऱ्यांसह कंत्राटदाराची कानउघडणी करून पथदीप व हायमास्ट रात्रीच्या वेळी सुरू राहतील अशी व्यवस्था करण्याची मागणी केली जात आहे.
