बेळगाव लाईव्ह : महिनाभरापासून पावसाने दडी मारल्याने चिंतेत असलेले शेतकरी आकाशाकडे डोळे लावून बसले होते. भातपिकांना पावसाची गरज असताना पावसाचा पत्ता नव्हता. अशातच हलगा गावातील नागरिकांनी पावसासाठी भीमसेनच्या पावलांची पूजा केली आणि अवघ्या २४ तासांत परिसरात पावसाने हजेरी लावली. त्यामुळे ‘पूजा केली अन् दुसऱ्याच दिवशी पाऊस आला!’ अशी चर्चा आता गावात रंगू लागली आहे.
हलगा, अलारवाड, शिंदोळी, मासमरी आदी गावांच्या सीमेवर असलेल्या भीमसेनच्या पावलांशी स्थानिकांची अनेक वर्षांपासून श्रद्धा जोडलेली आहे. पाऊस लांबल्यास या पावलांची पूजा करून पावसासाठी साकडे घालण्याची परंपरा आजही जपली जाते. यंदाही पावसाने महिनाभर दडी मारल्याने हलगा गावातील नागरिकांनी सोमवारी भीमसेनच्या पावलांची पूजा करत पावसासाठी प्रार्थना केली.
आणि मंगळवारी पहाटे पावसाच्या सरी कोसळल्या! एवढेच नव्हे, तर सायंकाळी सहाच्या सुमारास पुन्हा पावसाने हजेरी लावली. पूजा केल्यानंतर अवघ्या २४ तासांत पाऊस आल्याने गावकऱ्यांमध्ये समाधान व्यक्त होत असून, या पारंपरिक श्रद्धेची पुन्हा चर्चा सुरू झाली आहे.
पावसाच्या प्रतीक्षेत असलेल्या शेतकऱ्यांना दिलासा
गेल्या महिनाभरापासून पाऊस नसल्याने शेतीच्या कामांवर आणि भातपिकांच्या वाढीवर परिणाम होण्याची चिंता शेतकऱ्यांना सतावत होती. अशा परिस्थितीत झालेल्या पावसामुळे शेतकऱ्यांच्या आशा पुन्हा पल्लवित झाल्या आहेत.
पाऊस पडण्यामागे हवामानातील बदल कारणीभूत असले, तरी पूजा केल्यानंतर दुसऱ्याच दिवशी पाऊस आल्याचा योगायोग गावकऱ्यांसाठी विशेष ठरला आहे. त्यांच्या दृष्टीने हा केवळ पाऊस नसून, पिढ्यान्पिढ्या जपलेल्या श्रद्धेशी जोडलेला अनुभव आहे.
विज्ञानाच्या दृष्टीने हा योगायोग असू शकतो; मात्र गावकऱ्यांसाठी तो श्रद्धा आणि आशेचा क्षण आहे. निसर्गाच्या लहरीपणासमोर हतबल झालेल्या शेतकऱ्यांना पावसाच्या प्रत्येक सरीत दिलासा मिळतो. हलगा गावातील भीमसेनच्या पावलांची ही परंपरा त्याच ग्रामीण संस्कृतीची आणि लोकश्रद्धेची साक्ष देत पुन्हा एकदा चर्चेत आली आहे.
