बेळगाव लाईव्ह : उत्तर कर्नाटकातील आरोग्यसेवेला नवी दिशा देणारे महत्त्वाचे पाऊल उचलत बेळगावच्या अरिहंत हॉस्पिटलमध्ये कृत्रिम बुद्धिमत्ता (एआय) आधारित अत्याधुनिक फायब्रोस्कॅन यंत्रणेचे उद्घाटन करण्यात आले. याचवेळी हैदराबाद येथील नामांकित एआयजी हॉस्पिटलसोबत सामंजस्य करार (एमओयू) करण्यात आला. या कार्यक्रमाला देशातील ख्यातनाम गॅस्ट्रोएन्टेरोलॉजिस्ट डॉ. डी. नागेश्वर रेड्डी प्रमुख पाहुणे म्हणून उपस्थित होते.
यकृतविकारांचे निदान करण्यासाठी पारंपरिक पद्धतींमध्ये अनेकदा बायोप्सीसारख्या आक्रमक प्रक्रियांची गरज भासत असते. मात्र नव्याने सुरू करण्यात आलेल्या एआय आधारित फायब्रोस्कॅन तंत्रज्ञानामुळे यकृतातील फायब्रोसिस तसेच फॅटी लिव्हरचे निदान शस्त्रक्रियेशिवाय, वेदनारहित आणि अत्यंत अचूक पद्धतीने करता येणार आहे. यामुळे यकृतविकारांचे लवकर निदान होऊन योग्य वेळी उपचार सुरू करणे शक्य होणार आहे.
या अत्याधुनिक सुविधेमुळे बेळगाव व उत्तर कर्नाटकातील रुग्णांना अशा तपासणीसाठी मोठ्या शहरांकडे जाण्याची आवश्यकता कमी होणार असून, स्थानिक पातळीवरच दर्जेदार आरोग्यसेवा उपलब्ध होणार आहे.
अरिहंत हॉस्पिटल आणि एआयजी हॉस्पिटल यांच्यात झालेला सामंजस्य करार हा केवळ औपचारिक करार नसून वैद्यकीय ज्ञान, संशोधन आणि कौशल्य विकासासाठी महत्त्वाचा टप्पा मानला जात आहे. या कराराअंतर्गत गॅस्ट्रोएन्टेरोलॉजी, हेपॅटॉलॉजी आणि गॅस्ट्रोइंटेस्टायनल एंडोस्कोपी क्षेत्रातील सतत वैद्यकीय शिक्षण (सीएमई), वैज्ञानिक परिषद, तज्ज्ञांची मार्गदर्शन सत्रे, बहुविद्याशाखीय रुग्ण प्रकरणांची चर्चा आणि डॉक्टरांसाठी प्रशिक्षण कार्यक्रम आयोजित केले जाणार आहेत.
कार्यक्रमात बोलताना डॉ. डी. नागेश्वर रेड्डी यांनी उत्तर कर्नाटकातील गॅस्ट्रोएन्टेरोलॉजी आणि हेपॅटॉलॉजी सेवा अधिक सक्षम करण्यासाठी अशा सहकार्यात्मक उपक्रमांची गरज असल्याचे सांगितले. अशा भागीदारीमुळे आरोग्यसेवेचा दर्जा उंचावण्याबरोबरच रुग्णांच्या उपचार परिणामांमध्येही सकारात्मक बदल घडून येतील, असा विश्वास त्यांनी व्यक्त केला.
हॉस्पिटलचे संचालक अभिनंदन पाटील आणि उत्तम पाटील यांनी या उपक्रमाचे स्वागत करत भविष्यातही आधुनिक तंत्रज्ञानाच्या साहाय्याने रुग्णांना सर्वोत्तम सेवा देण्याचा निर्धार व्यक्त केला.
नैतिक मूल्यांवर आधारित, रुग्णकेंद्री आणि सर्वसमावेशक आरोग्यसेवा देण्यास कटिबद्ध असलेल्या अरिहंत हॉस्पिटलने गॅस्ट्रोएन्टेरोलॉजी, हेपॅटॉलॉजी, एंडोस्कोपी आणि अत्याधुनिक निदान सेवांमध्ये आणखी एक महत्त्वाचा टप्पा गाठला असून, उत्तर कर्नाटकातील आरोग्यसेवेसाठी हे पाऊल नवे मानदंड निर्माण करणारे ठरणार आहे.
