बेळगाव लाईव्ह : खासदार जगदीश शेट्टर यांच्या अध्यक्षतेखाली झालेल्या विमानतळ सल्लागार समितीच्या बैठकीत सांब्रा येथील बेळगाव विमान तळाच्या विस्तार कामांचा सविस्तर आढावा घेण्यात आला. बेळगावची हवाई संपर्क व्यवस्था अधिक सक्षम करण्यासाठी विविध विकासकामांना गती देण्यावर बैठकीत भर देण्यात आला.
बैठकीत हवाई दलाच्या वरिष्ठ अधिकाऱ्यांसोबत महत्त्वपूर्ण चर्चा झाली. समांतर धावमार्ग उभारणी तसेच नागरी विमान वाहतूक महासंचालनालयाच्या सुरक्षा निकषांची पूर्तता करण्यासाठी हवाई दलाच्या ताब्यातील सुमारे १५ ते १६ एकर जमीन आवश्यक असल्याचे सांगण्यात आले. यासाठी जवळपास ३२ एकर जमिनीचा एकत्रित प्रस्ताव जिल्हा प्रशासनाने राज्य सरकारकडे मंजुरीसाठी पाठविल्याची माहिती देण्यात आली.
यावेळी इंडिगो आणि स्टार एअर या विमान कंपन्यांना बेळगावहून पुणे, चेन्नई, अहमदाबाद, जोधपूरसह इतर प्रमुख शहरांसाठी नवीन विमानसेवा सुरू करण्याची विनंती करण्यात आली. बंद झालेल्या काही विमानसेवा पुन्हा सुरू करण्याची मागणीही सदस्यांनी केली.
प्रवाशांच्या सोयीसाठी विमानतळ आणि रेल्वे स्थानकादरम्यान विमानांच्या वेळेनुसार वातानुकूलित बस सेवा सुरू करण्याचा प्रस्ताव चर्चेत आला. हुबळीप्रमाणे ही सेवा तातडीने सुरू करण्याच्या सूचना उत्तर-पश्चिम कर्नाटक राज्य परिवहन महामंडळाच्या अधिकाऱ्यांना देण्यात आल्या.
विमानतळ परिसरात आगाऊ भाडे भरण्याची टॅक्सी सेवा, मोटार भाडे सुविधा तसेच पोलिस चौकी सुरू करण्याची मागणीही बैठकीत करण्यात आली. सुरक्षा आणि कायदा-सुव्यवस्थेच्या दृष्टीने ही सुविधा आवश्यक असल्याचे विमान कंपन्यांनी सांगितले.
बेळगाव शहर ते सांब्रा विमानतळ मार्गावरील वाहतूक कोंडी कमी करण्यासाठी चारपदरी रस्त्याच्या प्रस्तावाचाही आढावा घेण्यात आला. सार्वजनिक बांधकाम विभागासोबत चर्चा करून हे काम वेगाने पूर्ण करण्याचे आश्वासन देण्यात आले.
बैठकीपूर्वी समिती सदस्यांनी सुरू असलेल्या दुसऱ्या प्रवासी भवनाच्या कामांची पाहणी केली. सुमारे २२३ कोटी रुपयांच्या या प्रकल्पाचे ८७ टक्के काम पूर्ण झाले असून जून २०२६ पर्यंत प्रकल्प पूर्ण होण्याची शक्यता व्यक्त करण्यात आली.
नवीन प्रवासी भवनात एकाचवेळी सुमारे २ हजार ४०० प्रवाशांची क्षमता असणार असून आगमन आणि प्रस्थानासाठी प्रत्येकी १ हजार २०० प्रवाशांची व्यवस्था असेल. याशिवाय चार प्रवासी प्रवेश पूल, १४ नोंदणी कक्ष, दोन सामान वाहतूक पट्टे आणि उंच प्रकाशयंत्रणा उभारण्यात येणार आहे.
विमान उभे करण्याच्या जागेच्या विस्ताराची कामेही सुरू असून विमान थांबविण्याची क्षमता सध्याच्या ३ वरून १२ पर्यंत वाढविण्यात येणार आहे. त्यामुळे मोठ्या आकाराची विमानेही येथे उभी राहू शकतील.
बैठकीत बेळगाव विमानतळाला आंतरराष्ट्रीय दर्जा देण्याची तसेच स्वतंत्र मालवाहतूक केंद्र उभारण्याची मागणी पुन्हा एकदा जोरदारपणे करण्यात आली.
