बेळगाव लाईव्ह : बेळगावमधील शनिमंदिर परिसरातील जीवघेण्या खड्ड्यांचा प्रश्न प्रशासनाकडून सुटत नसल्याने, अखेर वाहतूक पोलिसांनीच हाती कुदळ-फावडी घेतली आहे. महापालिकेच्या नाकर्तेपणामुळे होणारे अपघात टाळण्यासाठी पोलिसांनी स्वतः रस्ता दुरुस्त करून एक नवा आदर्श घालून दिला आहे.
बेळगाव शहरात स्मार्ट सिटीच्या नावाखाली रस्ते खोदून ठेवण्यात आले आहेत, मात्र ते दुरुस्त करण्याकडे प्रशासनाचे पूर्णपणे दुर्लक्ष झाले आहे. विशेषतः शनिमंदिर परिसरात पडलेल्या मोठ्या खड्ड्यांमुळे दररोज अपघात होत होते. या समस्येबाबत महापालिका आणि संबंधित कंत्राटदारांकडे वारंवार तक्रारी करूनही त्यांनी याकडे सोयीस्कर दुर्लक्ष केले.
खड्ड्यांमुळे होणारी वाहतूक कोंडी आणि वाहनधारकांचे होणारे हाल पाहून, बेळगावच्या वाहतूक पोलिसांनी अखेर स्वतः मैदानात उतरण्याचा निर्णय घेतला. मंगळवारी पोलिसांनी हातात कुदळ आणि फावडे घेऊन रस्त्यावरील खड्डे मातीने बुजवले आणि रस्ता समतल केला. ज्या कामासाठी महापालिका जनतेचा पैसा खर्च करते, ते काम पोलिसांना करावे लागल्याने प्रशासकीय यंत्रणेच्या कार्यक्षमतेवर आता प्रश्नचिन्ह उपस्थित होत आहे.
या परिसरातील धुळीच्या प्रचंड प्रमाणामुळे स्थानिक व्यापारी आणि पादचाऱ्यांचे आरोग्य धोक्यात आले आहे. कंत्राटदार ढिम्म असताना, वाहतूक पोलिसांनी दाखवलेल्या या संवेदनशीलतेचे बेळगावमधून जोरदार कौतुक होत आहे. दरम्यान, “नागरी सुविधांसाठी प्रत्येक वेळी पोलिसांनीच का राबायचे?” असा संतप्त सवाल आता नागरिकांकडून विचारला जात आहे.
पोलिसांच्या या श्रमदानामुळे तूर्तास खड्ड्यांचा प्रश्न सुटला असला तरी, सुस्त बसलेले महापालिका प्रशासन यातून काही बोध घेणार का, हे पाहणे महत्त्वाचे ठरेल.
