बेळगाव लाईव्ह : एकेकाळी मराठी आमदारांनी कर्नाटकाच्या विधानसभेत मराठीतून बोलल्यानंतर, कानडीतून बोलण्याचा आणि मराठीतून बोलायचे असेल तर संसदेत जाण्याचा सल्ला देणारे नेते आज बेळगावमधून निवडणूक लढवून मतांसाठी मराठी भाषिकांचेच पाय धरत आहेत. अशा मराठीद्वेष्ट्या उमेदवाराला मराठी भाषिक चोख प्रत्त्युत्तर देतील, असा विश्वास म. ए. समिती युवा नेते शुभम शेळके यांनी व्यक्त केला.
बेळगाव लोकसभा मतदार संघासाठी निवडणुकीच्या आखाड्यात उतरलेले दोन्ही राष्ट्रीय पक्षांचे उमेदवार हे मराठी माणसाला संपविण्याच्या दृष्टिकोनातून निवडणूक लढवत आहेत. जे मराठी विरोधी वक्तव्ये करतात तेच आज मराठी माणसाचे पाय धरून मतयाचना करत आहेत.
मात्र छत्रपती शिवाजी महाराजांचे आदर्श जपणारा मराठी माणूस आपल्यावर झालेल्या अन्यायाविरोधात प्रश्न उपस्थित करत आहे. समितीचे उमेदवार महादेव पाटील यांना प्रचंड बहुमत देऊन सीमाभागातील मराठी भाषा, अस्मिता, संस्कृती टिकविण्यासाठी मराठी भाषिकांनी मतदान करायचे आहे. मराठी माणसाला विकत घेण्याचा प्रयत्न करणाऱ्यांना चपराक द्यायची आहे, अशी प्रतिक्रिया शुभम शेळके यांनी व्यक्त केली.
धनंजय पाटील यांनीदेखील यावेळी प्रतिक्रिया व्यक्त केली. आज महाराष्ट्र एकीकरण समिती लोकसभा निवडणूक लढवत आहे. महादेव पाटील यांचा उमेदवारी अर्ज भरण्यासाठी आज उपस्थित असलेला मराठी भाषिकांचा जनसमुदाय हा लक्षणीय आहे. आपल्यावर राष्ट्रीय पक्षांच्या माध्यमातून झालेल्या अन्यायाचा अत्याचाराचा बोध मराठी माणसाने घ्यावा, आणि समितीच्या उमेदवाराला बहुमत द्यावे असे आवाहन त्यांनी केले.
ते पुढे म्हणाले, दोन्ही राष्ट्रीय पक्ष पिछाडीवर पडले आहेत. एक उमेदवार आयात केला गेला आहे तर एक उमेदवारी कौटुंबिक पार्श्वभूमीवर उभा राहिला आहे. समितीच्या उमेदवाराला मिळत असणारा पाठिंबा पाहता समिती लवकरच अधिकृतरीत्या समोर येईल, असा विश्वास धनंजय पाटील यांनी व्यक्त केला.
