बेळगाव लाईव्ह:बेळगावच्या नामवंत महिला जलतरणपटू ज्योती पी. होसट्टी यांनी अंडरवॉटर स्पोर्ट्स असोसिएशन इंडिया या संघटनेतर्फे आयोजित 6 व्या अखिल भारतीय फिनस्विमिंग फेडरेशन कप -2023 स्पर्धेत स्पृहणीय यश संपादन केले आहे.
तालकटोरा स्टेडियम नवी दिल्लीच्या जलतरण संकुलामध्ये गेल्या 29 सप्टेंबर ते आज 2 ऑक्टोबरपर्यंत सहाव्या अखिल भारतीय फिनस्विमिंग फेडरेशन कप -2023 या स्पर्धेचे आयोजन करण्यात आले आहे.
सदर स्पर्धेत कर्नाटक राज्याचे प्रतिनिधित्व करताना बेळगावच्या ज्योती पी. होसट्टी यांनी महिलांच्या मास्टर्स व्ही2 : 40 ते 44 वर्षे वयोगटातील 200 मी. एसएफ मोनोफिन शर्यतीमध्ये 03:41.32 सेकंद इतका वेळ देऊन प्रथम क्रमांकासह सुवर्णपदक हस्तगत केले.
त्याचप्रमाणे 100 मी. बीएफ बीआय फीन्स शर्यतीत 01:25.40 सेकंद इतकी वेळ नोंदवून द्वितीय क्रमांकासह रौप्य पदक मिळविले. अंडरवॉटर स्पोर्ट्स असोसिएशन इंडियाच्या (युएसएआय) अध्यक्षा जयश्री पी. आणि सरचिटणीस मयूर पाटील यांच्या उपस्थितीत मान्यवरांच्या हस्ते ज्योती होसट्टी यांना पदक देऊन गौरविण्यात आले.
बेळगाव जिल्हा आरोग्य व कुटुंब कल्याण खात्याच्या कडोली प्राथमिक आरोग्य केंद्रातील कर्मचारी असलेल्या ज्योती पी. होसट्टी यांनी यापूर्वी अनेक वेळा राज्य, राष्ट्रीय आणि आंतरराष्ट्रीय पातळीवरील जलतरण स्पर्धांमध्ये चमकदार कामगिरी नोंदवत बेळगावचा नावलौकिक वाढवला आहे.
त्या शहरातील सुवर्ण जेएनएमसी जलतरण तलावात प्रशिक्षक उमेश कलघटगी, गोवर्धन काकतकर व नितेश कुडूचकर यांच्या मार्गदर्शनाखाली पोहण्याचा सराव करतात. अखिल भारतीय फिन स्विमिंग फेडरेशन कप स्पर्धेतील उपरोक्त यशाबद्दल ज्योती यांचे सर्वत्र अभिनंदन होत आहे.
https://x.com/belgaumlive/status/1708741082908184648?s=20
