सरकारी आणि अनुदानित शाळांमध्ये सरकारकडून राबविण्यात येणाऱ्या माध्यान्ह आहार योजनेमध्ये आता ‘उत्सव विशेष भोजन’ उपक्रमाचा समावेश करण्यात आला आहे. सदर शाळांसाठी ‘तुम्ही -आम्ही’ कार्यक्रमांतर्गत प्रत्येक सण आणि उत्सवा दिवशी यापुढे विद्यार्थ्यांना माध्यान्ह आहारात पौष्टिक आणि गोडधोड पदार्थ मिळणार आहेत.
शिक्षण खात्याने या संदर्भातील आदेश नुकताच बजावला असून देणगीदार, ट्रस्ट, संघ -संस्था, सामाजिक संस्था, शाळा सुधारणा समिती यांच्या माध्यमातून हा उपक्रम राबविला जाणार आहे.
माध्यम आहाराच्या जेवणासाठी शाळा या सर्वांकडून आर्थिक किंवा खाद्यपदार्थ स्वरूपात सहकार्य घेऊ शकतात. त्यामुळे यापुढे सामाजिक संस्था सरकारी शाळेतील मुलांना विशेष दिवसासाठी जेवण पुरवू शकतात. मात्र त्यामध्ये शासनाने ठरविलेल्या माध्यान्ह आहाराच्या यादीतील मेनू असावेत अशी अट आहे.
कोणतेही धर्म, भाषा, पंथ नसताना ‘आपण सर्वजण एक आहोत’ ही भावना मुलांमध्ये निर्माण व्हावी. प्राथमिक शाळांमध्ये लोक सहभाग देखील वाढावा. हा या योजनेचा मुख्य उद्देश आहे.
माध्यम आहाराच्या सूची प्रमाणे अंडी, शेंगा चिक्की, हलवा, बिस्किट, पापड, लोणचे, विविध प्रकारचे गोड पदार्थ, केळी, फळे मोड आलेले पदार्थ, सकाळचा नाश्ता आणि सायंकाळचे चहासोबतचे पदार्थ विद्यार्थ्यांना दिले जाऊ शकतात. आसाम, आंध्र प्रदेश, तेलंगणा, पंजाब, चंदीगड या राज्यांमध्ये ही योजना यापूर्वीच लागू झाली आहे.
