बेळगाव लाईव्ह : टिळकवाडी येथील सामर्थ्य व्यायाम मंदिरच्या व्यवस्थापनाकडून व्यायामपटूंना कथितरीत्या त्रास दिला जात असल्याचा तसेच व्यायामासाठी वाढीव शुल्क आकारले जात असल्याचा आरोप करत माजी नगरसेवक विनायक जी. गुंजटकर यांच्यासह व्यायामपटूंनी बेळगाव महानगरपालिकेकडे निवेदन सादर केले आहे. या प्रकरणाची गंभीर दखल घेऊन संबंधित व्यवस्थापनावर कारवाई करावी, अन्यथा व्यायाम मंदिरला देण्यात आलेला लीज करार रद्द करून जागेचा ताबा महानगरपालिकेने घ्यावा, अशी मागणी निवेदनातून करण्यात आली आहे.
महापौर प्रीती खामकर, उपमहापौर आणि महानगरपालिकेचे उपायुक्त उदय कुमार यांच्याकडे हे निवेदन देण्यात आले आहे.
व्यायाम शुल्कात मोठी वाढ केल्याचा आरोप
सामर्थ्य व्यायाम मंदिरमध्ये गेल्या ३० ते ३५ वर्षांपासून अनेक व्यायामपटू सराव करत आहेत. यामध्ये मध्यमवर्गीय आणि गरीब कुटुंबांतील तरुणांचा मोठा सहभाग असून, त्यांचे पालक उद्यमबाग औद्योगिक परिसरात अल्प उत्पन्नावर काम करतात. अशा परिस्थितीत व्यायामासाठी आकारण्यात येणाऱ्या शुल्कात मोठी वाढ झाल्याने आर्थिक अडचणींचा सामना करावा लागत असल्याचे व्यायामपटूंनी निवेदनात म्हटले आहे.
पूर्वी १५० रुपये असलेले मासिक शुल्क आता सुमारे ६०० रुपये करण्यात आल्याचा आरोप करण्यात आला आहे. सहा महिन्यांसाठी सुमारे ३,५०० रुपये आकारले जात असल्याचेही निवेदनात नमूद आहे. याशिवाय, व्यायामशाळेची जागा भाड्याने घ्यायची असल्यास पूर्वीच्या ९,००० रुपयांच्या तुलनेत आता ३० हजार रुपये भाडे मागितले जात असल्याचा दावा करण्यात आला आहे.
शुल्कवाढीमुळे आर्थिकदृष्ट्या दुर्बल व्यायामपटूंना सराव सुरू ठेवणे कठीण झाले असून, अनेक वर्षांपासून एकाच ठिकाणी व्यायाम करण्याची सवय असलेल्या तरुणांची गैरसोय होत असल्याचे त्यांनी सांगितले.
१९४४ च्या लीज करारातील अटींचे उल्लंघन झाल्याचा दावा
सामर्थ्य व्यायाम मंदिरची जागा बेळगाव महानगरपालिकेच्या मालकीची असल्याचे निवेदनात स्पष्ट करण्यात आले आहे. १३ डिसेंबर १९४४ रोजी तत्कालीन बेळगाव नगरपालिका आणि सामर्थ्य मंदिरचे तत्कालीन अध्यक्ष बी. आर. कुलकर्णी यांच्यात जागेबाबत करार झाला होता. या करारातील सहाव्या कलमानुसार, संबंधित जागेचा आणि इमारतींचा वापर केवळ व्यायामशाळा चालवण्यासाठी करणे अपेक्षित असल्याचे निवेदनात म्हटले आहे.
मात्र, सध्या या परिसराचा वापर मंदिर, कार्यालय आणि बॅडमिंटन हॉल अशा विविध कारणांसाठी केला जात असल्याचा आरोप करण्यात आला आहे. करारानुसार सुमारे १२,२७० चौरस फूट जागा देण्यात आली असताना, प्रत्यक्षात त्यापेक्षा अधिक क्षेत्राचा वापर केला जात असल्याचा दावाही निवेदनात करण्यात आला आहे.
व्यवस्थापनाने जागेचा वापर आणि बांधकामासंदर्भातील करारातील अटींचे पालन केले आहे की नाही, याची महानगरपालिकेने चौकशी करावी, अशी मागणी करण्यात आली आहे.
व्यवस्थापनाच्या निवडीवर आणि हिशेबावरही प्रश्नचिन्ह
व्यायाम मंदिरच्या व्यवस्थापन समितीची निवड लोकशाही पद्धतीने होत नसल्याचा आरोपही करण्यात आला आहे. समितीच्या सदस्यांची निवड निवडणुकीद्वारे न करता मनमानी पद्धतीने केली जात असल्याचे निवेदनात म्हटले आहे. तसेच, नियमित लेखापरीक्षण आणि आर्थिक व्यवहारांमधील पारदर्शकतेबाबतही प्रश्न उपस्थित करण्यात आले आहेत.
व्यायाम मंदिरच्या नूतनीकरणासाठी झालेल्या खर्चाच्या आकडेवारीत तफावत असल्याची चर्चा असल्याचे नमूद करत, संबंधित खर्चाचे लेखापरीक्षण करून आर्थिक व्यवहारांची तपासणी करण्याची मागणी करण्यात आली आहे.
रस्त्यावरील अतिक्रमण हटवण्याची मागणी
व्यायाम मंदिरच्या परिसरात रस्त्यापर्यंत शेड उभारण्यात आल्याचा आणि एका बाजूचा रस्ता कायमस्वरूपी भिंत बांधून बंद करण्यात आल्याचा आरोप निवेदनात करण्यात आला आहे. यामुळे वाहतुकीस अडथळा निर्माण होत असून, नागरिकांची गैरसोय होत असल्याचे तक्रारदारांचे म्हणणे आहे.
संबंधित भिंतीवर खासगी मालमत्ता असल्याचा उल्लेख करण्यात आला असल्याबाबतही निवेदनातून प्रश्न उपस्थित करण्यात आला आहे. महानगरपालिकेच्या मालकीच्या जागेवर अशा प्रकारे बांधकाम किंवा अडथळा निर्माण करण्यात आला असल्यास त्याची चौकशी करून रस्ता वाहतुकीसाठी खुला करावा, अशी मागणी करण्यात आली आहे.
महानगरपालिकेने कारवाई न केल्यास लोकायुक्तांकडे जाणार
सामर्थ्य व्यायाम मंदिर हे जुने आणि प्रसिद्ध व्यायाम केंद्र असून, येथून प्रशिक्षण घेतलेल्या अनेक व्यायामपटूंनी राज्य आणि राष्ट्रीय स्तरावर कामगिरी केल्याचे निवेदनात नमूद आहे. गरीब आणि मध्यमवर्गीय तरुणांना परवडणाऱ्या शुल्कात व्यायामाची सुविधा उपलब्ध करून द्यावी, अशी मागणी करण्यात आली आहे.
महानगरपालिकेने या तक्रारीची चौकशी करून संबंधित व्यवस्थापनाला करारातील अटींचे पालन करण्याचे निर्देश द्यावेत. अटींचे उल्लंघन सिद्ध झाल्यास लीज करार रद्द करून व्यायामशाळेचा ताबा महानगरपालिकेने घ्यावा किंवा योग्य व्यायामपटू संस्थेला नाममात्र भाड्याने जागा उपलब्ध करून द्यावी, अशी मागणी विनायक गुंजटकर आणि इतर व्यायामपटूंनी केली आहे.
महानगरपालिकेकडून योग्य कारवाई न झाल्यास या प्रकरणी अर्जिनल फोरम किंवा लोकायुक्तांकडे निवेदन देण्याचा इशाराही तक्रारदारांनी दिला आहे.
दरम्यान, या निवेदनातील आरोपांबाबत संबंधित व्यवस्थापनाची भूमिका समोर आलेली नाही. आरोपांची स्वतंत्र पडताळणी आणि महानगरपालिकेच्या चौकशीनंतरच या प्रकरणातील वस्तुस्थिती स्पष्ट होऊ शकेल.
