1 नोव्हेंबर काळ्यादिनानिमित्त विराट मूक फेरीत सीमाभागातील मराठी जनतेने सहभागी व्हावे, 65 वर्षांच्या या लढ्यात आजही ताकत आहे हे दाखवण्यासाठी अटक झाली तरी पर्वा न करता सायकल फेरी काढणार असा निर्धार मध्यवर्ती म. ए. समिती बैठकीत करण्यात आला.
मराठा मंदिर येथे मंगळवारी कार्याध्यक्ष मनोहर किणेकर यांच्या अध्यक्षतेखाली मध्यवर्ती म. ए. समितीची बैठक झाली.
किणेकर यांनी, सीमाभाग वादग्रस्त भाग आहे, हे केंद्र सरकारने मान्य केले आहे. तरी जाणीवपूर्वक आमच्यावर कन्नडसक्ती लादण्यात येत आहे. आता कर्नाटकाने पुन्हा कन्नडसक्तीचा कायदा केला आहे. तो कायदा सीमाभागात लागू करण्यात येऊ नये. अन्यथा आम्ही रस्त्यावर उतरून तीव्र आंदोलन छेडू. सीमाभाग महाराष्ट्रात समाविष्ट करण्यासाठी आम्ही 65 वर्षे लढा देत आहोत. आजही सीमाभागातील लोकांची इच्छा महाराष्ट्रातच समाविष्ट होण्याची आहे, हे दाखवून देण्यासाठी दोन वर्षांनंतर होणार्‍या काळ्यादिनाच्या फेरीत मोठ्या संख्येने सहभागी व्हावे असे आवाहन केले.
1 नोव्हेंबर काळ्यादिनाच्या फेरीबाबत कधीही परवानगी मागितलेली नाही. त्यामुळे कोणीही परवानगी आहे की नाही याची काळजी करू नये. आमचा लढा महत्वाचा आहे. त्यामुळे अटक झाली तरी चालेल पण मूक सायकल फेरी होणारच आहे. त्यामुळे कार्यकर्त्यांनी मोठ्या संख्येने या मिरवणुकीत सहभागी व्हावे, असे आवाहनही त्यांनी केले.
महाराष्ट्र-कर्नाटक सीमाप्रश्नी सर्वोच्च न्यायालयात 23 नोव्हेंबर रोजी महत्वाची सुनावणी होणार आहे. कर्नाटकाने मराठी माणसांच्या दाव्याला आव्हान दिले आहे. हा दावा न्यायालयात चालू शकत नाही, असे त्यांचे म्हणणे आहे. त्यामुळे 1 नोव्हेंबर रोजी होणारा काळादिन आणि निषेध फेरी अतिशय महत्वाची आहे. गावागावी जनजागृती करून ही फेरी विराट करावीच लागेल, असे आवाहन अ‍ॅड. राजाभाऊ पाटील यांनी केले.
यावेळी मालोजी अष्टेकर, प्रकाश मरगाळे, रणजीत चव्हाण-पाटील, संभाजी देसाई, गोपाळ देसाई आदींनी मनोगत व्यक्त केले. काळ्यादिनाच्या जागृतीसाठी घटक समित्यांनी बैठका घेऊन गावोगावी जागृती करण्याचे आवाहन करण्यात आले.
एस. एल. चौगुले, अ‍ॅड. एम. जी. पाटील, विकास कलघटगी, निरंजन सरदेसाई, बी. डी. मोहनगेकर, नानू पाटील, रावजी पाटील, बी. एस. पाटील आदी उपस्थित होते.
महाराष्ट्रातील सर्वपक्षीय नेत्यांना पत्र1 नोव्हेंबर काळ्यादिनाच्या फेरीत सहभागी होण्यासाठी महाराष्ट्रातील सर्वपक्षीय नेत्यांना पत्र पाठवण्यात येणार आहे. मिरवणुकीनंतर मराठा मंदिर येथे जाहीर सभा होणार आहे, अशी माहिती यावेळी देण्यात आली.
