शहरानजीकची सुवर्ण विधानसौधची इमारत म्हणजे ‘पांढरा हत्ती’ झाला असून या इमारतीचा उपयोग कमी आणि देखभालीचा खर्च अधिक होत आहे. या खर्चामध्ये कपात करण्याच्या दृष्टीने राज्य शासनाने पावले उचलण्यास सुरुवात केली आहेत. त्याचाच एक भाग म्हणून सुवर्ण सौध इमारतीवर सोलार पॅनल बसविण्याचा निर्णय घेण्यात आला आहे.
बेळगावातील मराठी भाषिकांच्या जखमेवर मीठ चोळण्यासाठी आणि बेळगाववर हक्क सांगण्यासाठी कांही वर्षापूर्वी शहरापासून 8 -10 कि. मी. अंतरावरील हालगा -बस्तवाड येथे सुवर्ण विधानसौध इमारत बांधण्यात आली. यासाठी हालगा -बस्तवाड येथील शेतकऱ्यांची सुमारे 130 एकर पिकाऊ जमीन संपादित करण्यात आली.
मात्र या इमारतीची उभारणी झाल्यानंतर अल्पावधीतच ही वास्तू पांढरा हत्ती ठरली असून देखभालीच्या नांवाखाली अवाढव्य खर्च होत आहे. राज्य शासनाचे हिवाळी अधिवेशन वगळता सुवर्ण सौधची ही इमारत उर्वरित कालावधीमध्ये धूळ खात पडून असते. या ठिकाणी वीज पुरवठ्याच्या नावाखाली दरवर्षी लाखो रुपये खर्च होत आहेत. त्यामुळे पर्याय म्हणून सौर ऊर्जेचा अर्थात सोलारचा प्रस्ताव हाती घेण्यात आला आहे.
सुवर्ण विधानसौधच्या छतावर सोलर पॅनल बसविल्यास भविष्यात किमान येथील वीज बिलाची बचत होणार असून त्यामुळे सरकारी तिजोरीवरील भारही थोडाफार कमी होणार आहे.
जिल्हा पालक मंत्री गोविंद कारजोळ यांनी नुकतीच बेळगावातील शासकीय विश्रामधाम येथे अधिकाऱ्यांची बैठक घेतली होती. या बैठकीत बेळगाव जिल्ह्यातील शासकीय कार्यालयांवरही सोलर पॅनल बसविण्याचा प्रस्ताव पुढे आला आहे.
