मंगळवारी मान्सून पावसाने दिलेली सलामी बुधवारी जोरदार पणे कायम राहीली. बेळगाव शहरासह आसपासच्या परिसरात बुधवार दिवसभर रिपरिप सुरूच होती त्यामुळे शहरातील जनजीवन अस्तव्यस्त झाले होते.
एकीकडे लॉकडाऊन तर दुसरीकडे हवेतील गारठा आणि आणि जोरदार पाऊस त्यामुळे बेळगावकर जनतेनी घरातच रहाणे पसंत केले होते.
बुधवारच्या पावसाने पूर्व भागातील अगोदर झालेल्या पेरण्यांना पाऊस पोषक असला तरी गेल्या आठवड्यात झालेल्या पेरण्याना अधिक पाऊस धोक्याचा ठरला आहे कारण भाताचे मूळ पाणी एक झालं आहे.
संपूर्ण कर्नाटक राज्यात मान्सूनचे धडाकेबाज आगमन झाले असून राज्यात सगळीकडे बुधवारी दमदार पावसाची नोंद झाली आहे.अरबी समुद्रात कमी दाबाचा पट्टा निर्माण झाल्याने त्याचा प्रभाव पुढील चार दिवस राहणार असल्याचे हवामान खात्याने जाहीर केले आहे.
उडुपी आणि किनारपट्टी भागात सतरा तारखेला ऑरेंज अलर्ट घोषित करण्यात आला असून अठरा ते वीस तारखे पर्यंत येलो अलर्ट जाहीर केला आहे.समुद्र किनारपट्टी आणि मध्य कर्नाटक जोरदारपणे पावसाची सुरुवात झाली आहे.
कारवार 10 सें. मी , सिद्धापूर 11सें मी चिक्कमंगलुरु 14 से मी पावसाची नोंद झाली आहेअगुंबे येथे देखील आज मुसळधार पावसाची नोंद झाली आहे.आगामी चार दिवसात बेळगाव आणि धारवाड जिल्ह्यात देखील मुसळधार पाऊस होण्याची शक्यता हवामान खात्याने व्यक्त केली आहे.
बंगलोर शहरात देखील पुढचे दोन दिवस मुसळधार पाऊस होण्याची शक्यता राज्य हवामान खात्याने संचालक सी एस पाटील यांनी वर्तवली आहे.
