बेळगाव लाईव्ह : बेळगाव शहर पोलीस आयुक्तालयाच्या हद्दीत सार्वजनिक ठिकाणी मद्यप्राशन करणाऱ्या आणि गांजा सेवन करून गैरवर्तन करणाऱ्या व्यक्तींवर विविध पोलीस ठाण्यांच्या पथकांनी धडक कारवाई केली आहे. या धडक मोहिमेत अनेक आरोपींना ताब्यात घेऊन त्यांच्यावर गुन्हे दाखल करण्यात आले असून, पोलीस आयुक्त आणि पोलीस उपआयुक्तांनी (डीसीपी) या यशस्वी कारवाईबद्दल संबंधित पोलीस निरीक्षक, उपनिरीक्षक व कर्मचाऱ्यांचे कौतुक केले आहे.
गांजा सेवन करणाऱ्यांवर अमली पदार्थ विरोधी कायद्यांतर्गत कारवाई करण्यात आली आहे. खडेबाजार पोलीस ठाण्याच्या हद्दीत शिवाजी रोड नाला जवळ अस्वाभाविक वर्तन करणाऱ्या अतीश राजेंद्र जर्ना (२८, रा. शहापूर) याला पीएसआय एस. आर. मुतत्ती यांनी ताब्यात घेतले. तसेच शहापूर पोलीस ठाण्याच्या हद्दीत वडगाव-येरमाळ जवळ गांजाच्या नशेत असलेल्या प्रशांत मोनप्पा शहापूरकर (२६), अरुण केशव मंझाकरकर (२२) आणि शरद रवी गुडसुकरकर (२१) या तिघांना पोलीस निरीक्षक एस. एस. सीमानी यांनी ताब्यात घेतले. वैद्यकीय तपासणीत या सर्वांनी गांजा सेवन केल्याचे स्पष्ट झाले आहे.
सार्वजनिक ठिकाणी मद्यप्राशन करणाऱ्यांवर अबकारी कायद्यान्वये विविध पोलीस ठाण्यांनी गुन्हे नोंदवले आहेत. कॅम्प पोलिसांनी आयनॉक्स टॉकीजजवळ अब्दुल रहमान याच्यावर, तर मारीहाळ पोलिसांनी सुळेभावी सरकारी रुग्णालयाजवळ भीमराय यल्लाप्पा पार्वती (३५) याच्यावर कारवाई केली. तिळकवाडी पोलिसांनी पहिल्या रेल्वे गेटजवळ शमशेरखान महबूब खान पठाण (४२) याला मद्यप्राशन करताना पकडले. या सर्व कारवायांमध्ये पोलिसांनी आरोपींकडून दारूच्या बाटल्या आणि इतर साहित्य जप्त केले आहे.
बेळगाव ग्रामीण, काकती आणि मार्केट पोलीस ठाण्यांच्या हद्दीतही मद्यपींवर कडक कारवाई करण्यात आली. ग्रामीण पोलिसांनी राकसकोप डॅमजवळ नागराज हुदली (२७) व रोहित भोवी (२२) यांना, तर यरमाळ बायपास रस्त्यावर प्रवीण लोकर (३८) यांच्यासह पाच जणांना अटक केली. काकती पोलिसांनी अलतगा खडी मशीनजवळ दोघांना ताब्यात घेतले. मार्केट पोलिसांनी दोन वेगवेगळ्या कारवायांमध्ये ओल्ड व्ही. जी. रोड आणि ओल्ड पी. रोड परिसरामध्ये सार्वजनिक ठिकाणी दारू पिणाऱ्या आशिफ हंचिनमणी (४२), अकबर मुल्ला (५४), सल्लाउद्दीन मिरानदार (२८) आणि कुमार सण्णरामगोळ (४६) यांच्यावर गुन्हे दाखल करून पुढील कायदेशीर तपास सुरू केला आहे.
