गॅंगवाडी येथे रविवारी मध्यरात्री झालेल्या एका युवकाचा तीक्ष्ण हत्याराने निघृण खून झाल्या प्रकरणी माळमारुती पोलिसांनी 2 जणांना चौकशीसाठी ताब्यात घेतले आहे.
शहरातील गॅंगवाडी येथे रविवारी रात्री 11:30 वाजण्याच्या सुमारास अज्ञात जमावाने शहबाज पठाण (वय 24, रा. अझमनगर) या युवकावर सशस्त्र हल्ला करून तीक्ष्ण हत्याराने त्याचा खून केला होता.
सदर घटनेनंतर गॅंगवाडी परिसरात तणावाचे वातावरण निर्माण झाले होते. खुनी हल्ल्याची माहिती मिळताच माळमारुती पोलिसांनी तात्काळ घटनास्थळी धाव घेऊन पंचनामा करण्याबरोबरच शाब्बास पठाण याला सिव्हिल हॉस्पिटलमध्ये हलविले. तथापि उपचाराचा फायदा न होता त्याचा मृत्यू झाला.
या खुनी हल्ल्याची माहिती मिळतात सिव्हिल हॉस्पिटल आवारामध्ये पठाण याच्या कुटुंबीयांसह पाठीराखे आणि हितचिंतकांनी एकच गर्दी केली होती. या मोठ्या जमावाला पांगवण्यासाठी पोलिसांना सौम्य लाठीमारही करावा लागला. शहबाज पठाण यांचा खून टोळीयुद्धातून झाला की पूर्ववैमनस्यातून? याचा तपास पोलिस करत असून चौकशीसाठी दोघा युवकांना ताब्यात घेण्यात आले आहे.
पोलीस निरीक्षक गड्डेकर याप्रकरणी अधिक तपास करीत आहेत. सदर खून पूर्ववैमनस्यातून झाला असावा असा दाट संशय असला तरी खुनाचे नेमके कारण काय? याचा शोध पोलीस घेत आहेत. दरम्यान मयत शाबाज पठाण यांच्यावर दफनविधी करण्यात येत आहे.
