बेळगाव शहर विकास प्राधिकरण अर्थात बुडाचे कार्यक्षेत्र वाढविण्या संदर्भात राज्य शासनाकडे मंजुरीसाठी पाठविण्यात आलेल्या प्रस्तावास येळ्ळूर ग्रामपंचायतीसह समस्त गावकऱ्यांनी तीव्र विरोध केला आहे. बुडाने जर येळ्ळूरमध्ये जमीन घेण्याचा प्रयत्न केला तर तीव्र आंदोलन छेडण्याचा इशारा येळ्ळूर ग्राम पंचायतीसह समस्त ग्रामस्थांनी दिला आहे.
येळ्ळूर ग्राम पंचायत आणि ग्रामस्थांच्या नुकत्याच झालेल्या बैठकीत हा इशारा देण्यात आला. येळ्ळूर ग्राम पंचायत आणि समस्त येळ्ळूर गावाचा बुडाच्या दक्षिण भागातील विशेष करून येळ्ळूर परिसरातील कार्यक्षेत्रवाढीला विरोध आहे. बुडाला येळ्ळूरची एक इंचही जमीन घेऊ देणार नाही, अशी ठाम भूमिका येळ्ळूर ग्राम पंचायत व गावकऱ्यांनी घेतली आहे. बुडाने जर येळ्ळूरमधील जमीन घेण्याचा प्रयत्न केला तर तीव्र आंदोलन करण्यात येईल, असा इशारा ग्राम पंचायत सदस्यांनी दिला आहे.
बेळगाव शहर विकास प्राधिकरण अर्थात बोर्डाचे कार्यक्षेत्र बेळगाव शहर व तालुक्यात पसरले असून सध्या या कार्यक्षेत्रात शहरासह तालुक्यातील 27 गावे आहेत. बुडा कार्यक्षेत्र वाढीच्या प्रस्तावास मंजुरी मिळाल्यास यामध्ये आणखी 9 गावांची भर पडणार आहे. कार्यक्षेत्र वाढीच्या प्रस्तावानुसार बुडाचे कार्यक्षेत्र पूर्वेला सांबरा पश्चिमेला कल्लेहोळ, मण्णूर तर दक्षिणेला येळ्ळूर व धामणे गावापर्यंत विस्तारले जाणार आहे. नव्याने कार्यक्षेत्र समाविष्ट होणाऱ्या गावांमध्ये यापुढे बांधकामांना व मिळणार आहे त्याचप्रमाणे या गावाची “हद्द” तसेच “लँड यूज” देखील बोर्डाकडून निश्चित केली जाणार आहे.
