बुधवारी रात्री भरतेश कॉलेज जवळ झालेल्या घटनेत एकावर चाकू हल्ला झाला आहे. या प्रकरणी मार्केट पोलिसांनी पाच अल्पवयीन मुलांसह सहा जणांना अटक करण्यात आली आहे.
अभिषेक महावीर कडबी ( अलारवाड) असे चाकु हल्ल्यात गंभीर जखमी झालेल्या तरुणाचे नाव आहे.
भांडण सोडविण्यासाठी गेलेल्या अमित बाहुबली पंचोदे ( रा.हलगा), सिध्दार्थ कल्लाप्पा जंगवाड ( अलारवाड) यांच्यावरही हल्ला करण्यात आला आहे.बुधवारी रात्री ही घटना घडली आहे.
गुरुवारी रोहित फकिरा पुजारी (गांधीनगर) या तरुणाला अटक करण्यात आली आहे. याबरोबरच ताशिलदार गल्ली, खासबाग, समर्थनगर व महाव्दार रोड परिसरातील पाच अल्पवयीन मुलांनाही पोलिसांनी अटक केली आहे.
उपलब्ध माहितीनुसार जखमी अभिषेक व एका अल्पवयीन मुलाची कॉलेजमध्ये मैत्री होती. याच मैत्रीतून बुधवारी आमोरासमोर आल्यावर दोघे बोलले. त्यानंतर भांडण होवून अभिषेकने अल्पवयीन मुलाला एक लगावले. त्यानंतर त्या अल्पवयीन मुलाने आपल्या मित्रांना बोलावून अभिषेकवर चाकु व रॉडने हल्ला केला. भांडण सोडविण्यासाठी आलेल्या दोघा जणांवरही हल्ला करण्यात आला आहे.
