नागरिकांनी स्थानिक डॉक्टरांच्या प्रिस्क्रिप्शन नुसारच औषधे घ्यावे औषधांची ऑनलाइन खरेदी करू नये. तसेच सरकारने सर्वसामान्यांच्या आरोग्यावर थेट परिणाम करणाऱ्या ऑनलाईन औषध विक्रीवर बंदी घालावी, अशी मागणी बेळगाव डिस्ट्रिक्ट रिटेल फार्मसी असोसिएशनचे सेक्रेटरी जयवंत साळुंके यांनी केली आहे.
कन्नड साहित्य भवन येथे मंगळवारी सकाळी आ
योजित पत्रकार परिषदेत ते बोलत होते. ऑनलाइन औषध खरेदीचा सर्वसामान्य नागरिकांच्या आरोग्यावर कसा थेट परिणाम होऊ शकतो याचा पुरावा साळुंके यांनी पत्रकार परिषदेत सादर केला. आमच्यापैकी एकाने फ्लिपकार्टद्वारे बेटनोव्हेट हे औषधी क्रीम ऑनलाईन खरेदी केले. बाजारात या क्रीमची प्रत्यक्ष किंमत 44.10 रुपये इतकी आहे, परंतु ऑनलाइन हे क्रीम 105 रुपयाला पडले. या उत्पादनाचे बिल प्रिन्स चिकन, नवी दिल्ली या एजन्सीकडून काढण्यात आले आहे. तथापि या एजन्सीकडे औषध परवाना क्रमांक नाही, शिवाय बिलावर बॅच नंबर तर नाहीच शिवाय एक्सपायरी डेटही नाही. ड्रग अँड कॉस्मेटिक अॅक्ट, डीपीसीओ आणि एमआरपी अॅक्ट या सर्व कायद्यांचा भंग करणारा हा प्रकार आहे. या पद्धतीची ऑनलाईन औषध विक्री ही बेकायदेशीर तर आहेच शिवाय नागरिकांच्या आरोग्याच्या दृष्टीने घातकही आहे, असे साळुंके यांनी स्पष्ट केले.
देशभरातील अधिकृत परवानाधारक औषध विक्रेत्यांनी सर्वसामान्य नागरिकांच्या आरोग्यास धोकादायक ठरू शकणाऱ्या ऑनलाईन औषध विक्री वर बंदी घालण्याची मागणी यापूर्वी बऱ्याचदा केली आहे. बेळगाव डिस्ट्रिक जिल्हा रिटेल फार्मसी असोसिएशनही याला अपवाद नाही. तथापि अद्यापही ऑनलाइन औषध विक्री सुरूच असल्याने या विरुद्ध आम्ही पुन्हा आवाज उठवित आहोत. यासाठी बेटनोव्हेट क्रीमचा सबळ पुरावाही आमच्याकडे आहे. तेंव्हा नागरिकांनी आरोग्याला घातक ठरू शकणाऱ्या ऑनलाइन औषधांची खरेदी करू नये. त्यांनी आपल्या स्थानिक डॉक्टरांच्या प्रिस्क्रिप्शनद्वारेच औषधे खरेदी करावीत. तसेच सरकारने ऑनलाईन औषध विक्रीवर त्वरित बंदी घालावी, अशी मागणी जयवंत साळुंके यांनी केली.
पत्रकार परिषदेस बेळगाव डिस्ट्रिक्ट रिटेल फार्मसी असोसिएशनचे अध्यक्ष नंदकिशोर सारस्वत- नागोरी, खजिनदार नितीन झंवर, महेश अनगोळकर, शैलेंद्र जैन, स्वप्निल तरळे, विक्रांत शानबाग, रमेश जैन, पवन देसाई आदी उपस्थित होते.
_________
(*** बातमी संजयने दिली आहे)
