रामा शिंदोळकर, वय 78 वर्षे …सीमाप्रश्नाच्या प्रत्येक आंदोलनात आपली सायकल घेऊन येणारे कोनवाळ गल्लीचे जुने शिलेदार, सध्या वयाच्या मानाने आजारी आहेत, येथील दक्षता हॉस्पिटलमध्ये त्यांच्यावर उपचार सुरू आहेत. त्यांचं हृदय अजूनही धडधडतंय सीमाप्रश्नासाठी. समिती नेते आणि कार्यकर्त्यांनी त्यांना आधार दिला तर नक्कीच समाधान लाभू शकेल त्या सिमा तपस्विला.
बेळगाव live ला समजलेली माहिती खरी आहे. ज्या व्यक्तीने तहानभूक हरपून आपले कार्यकर्तेपण जपले त्याचीच आज अखेरची घरघर सुरू आहे. समितीच्या जीवावर कोणत्याही पदाची अपेक्षा न करता झटलेला हा कार्यकर्ता आहे. ज्यांनी पदे भोगली त्यांच्यासाठी झटलेला म्हातारा आहे. दाढीच्या केसांप्रमाणेच या लढ्यात पिकलेले हे पान केंव्हा गळून पडेल सांगता येत नाही.त्याच्या जीवनाची अखेरची घरघर दक्षता हॉस्पिटल मध्ये सुरू आहे.
बेळगाव live चे एकच आवाहन आहे, या तपस्विला त्याच्या शेवटच्या प्रवासात मदतीचा हात द्या. ज्याने आपल्या हयातीत महाराष्ट्रात जाण्याची स्वप्नं पाहिली आणि ती पूर्ण न झाल्याचं दुःखही भोगलं, त्या रामा मामाचे डोळे पूर्ण मिटण्यापूर्वी त्याला शब्द द्या. एकीने लढण्याची प्रतिज्ञा त्याच्या कानात गुंजवा…. तरच जन्मभर जळलेला तो यज्ञकुंड शांत होईल……
Belgaum the great,Rama shindolkar saheb lavkar bare hotil,we pray for him,