बेळगाव लाईव्ह : बंगळुरूमधील आयटी आणि बिगर-आयटी कॉर्पोरेट क्षेत्रात कर्नाटकातील स्थानिक तरुणांना कथितपणे डावलले जात असल्याच्या तक्रारींची गंभीर दखल घेऊन हा भेदभाव दूर करण्यासाठी स्वतंत्र आणि सर्वसमावेशक धोरण तयार करावे, अशी मागणी सामाजिक कार्यकर्ते राजकुमार टोपण्णवर यांनी मुख्यमंत्री सिद्धरामय्या यांच्याकडे केली आहे.
यासंदर्भात त्यांनी जिल्हाधिकारी कार्यालयामार्फत मुख्यमंत्र्यांना निवेदन सादर केले.
बंगळुरू हे देशातील प्रमुख आयटी आणि कॉर्पोरेट केंद्र बनले असताना कर्नाटकातीलच गुणवंत आणि पात्र तरुणांना रोजगाराच्या संधी, पदोन्नती तसेच नेतृत्वाच्या पदांमध्ये समान संधी मिळत नसल्याच्या तक्रारी पुढे येत आहेत. काही कॉर्पोरेट संस्थांमध्ये विशिष्ट राज्यांतील किंवा ओळखीच्या व्यक्तींना प्राधान्य दिले जाते, तर स्थानिक उमेदवारांना डावलले जाते, असा आरोप टोपण्णवर यांनी निवेदनातून केला आहे.
हा प्रश्न केवळ बंगळुरूपुरता मर्यादित नसून उत्तर कर्नाटकासह राज्यातील सर्व जिल्ह्यांतील तरुणांच्या रोजगार आणि भविष्याशी संबंधित आहे. शिक्षण पूर्ण करून चांगल्या करिअरच्या अपेक्षेने बंगळुरूकडे येणाऱ्या तरुणांना स्वतःच्याच राज्यात रोजगाराच्या संधींसाठी संघर्ष करावा लागणे योग्य नाही, असे त्यांनी नमूद केले.
इतर राज्यांतील गुणवंत आणि कुशल तरुणांनी कर्नाटकात काम करण्यास आपला विरोध नसल्याचे स्पष्ट करताना, स्थानिक तरुणांनाही त्यांच्या पात्रतेनुसार समान संधी मिळणे आवश्यक असल्याचे टोपण्णवर यांनी म्हटले आहे. कॉर्पोरेट क्षेत्रातील भरती आणि पदोन्नती प्रक्रियेत पारदर्शकता आणून स्थानिक कर्मचाऱ्यांवरील कथित अन्यायाची निष्पक्ष चौकशी करावी, अशी मागणीही त्यांनी केली.
निवेदनातील प्रमुख मागण्या
- कॉर्पोरेट क्षेत्रातील भरती आणि पदोन्नती प्रक्रियेत पारदर्शकता आणावी.
- स्थानिक तरुणांवरील कथित भेदभावाच्या तक्रारींची चौकशी करण्यासाठी सरकारी यंत्रणा स्थापन करावी.
- कॉर्पोरेट क्षेत्रात कन्नड भाषा आणि स्थानिक संस्कृतीला प्रोत्साहन द्यावे.
- कर्नाटकातील तरुणांना एआय आणि आधुनिक तंत्रज्ञानाचे प्रशिक्षण द्यावे.
- उत्तर कर्नाटकासह राज्यातील सर्व जिल्ह्यांमध्ये कौशल्य विकास आणि रोजगार केंद्रे बळकट करावीत.
- पात्र स्थानिक कर्मचाऱ्यांना वरिष्ठ आणि नेतृत्वाच्या पदांवर पोहोचण्यासाठी समान संधी द्यावी.
“बंगळुरूच्या विकासात कर्नाटकातील तरुण केवळ प्रेक्षक राहता कामा नयेत. त्यांनी या विकासात सक्रिय सहभाग घेऊन नेतृत्वही केले पाहिजे. आपल्या राज्याच्या राजधानीतच स्थानिक तरुणांना परके असल्याची भावना निर्माण होणे योग्य नाही. हा केवळ रोजगाराचा प्रश्न नसून तरुणांची स्वप्ने, सन्मान आणि कर्नाटकच्या भविष्याचा प्रश्न आहे,” असे राजकुमार टोपण्णवर यांनी स्पष्ट केले.
कॉर्पोरेट क्षेत्रातील कथित भेदभाव दूर करून कर्नाटकातील तरुणांना त्यांच्या गुणवत्तेनुसार रोजगार आणि प्रगतीच्या समान संधी उपलब्ध करून देण्यासाठी राज्य सरकारने ठोस पावले उचलावीत, अशी मागणी त्यांनी केली आहे.