बंगळुरू अर्बनपेक्षा १२.३३ लाख मतदार अधिक; बेळगाव उत्तर, दक्षिण आणि ग्रामीण मतदारसंघांत मिळून ६.३५ लाख मतदार
बेळगाव लाईव्ह : कर्नाटकातील सर्वाधिक मतदारसंख्या असलेला जिल्हा म्हणून बेळगावने अव्वल स्थान पटकावले आहे. विशेष सखोल मतदार यादी पुनरीक्षण (SIR 2026) प्रक्रियेनंतर २७ ऑक्टोबर रोजी प्रसिद्ध झालेल्या अंतिम मतदार यादीत बेळगाव जिल्ह्यात तब्बल ३६ लाख ३५ हजार ८६० मतदारांची नोंद झाली आहे. राज्यातील ३४ निवडणूक जिल्ह्यांमध्ये बेळगावने सर्व जिल्ह्यांना मागे टाकले आहे.
मुख्य निवडणूक अधिकारी, कर्नाटक यांच्या कार्यालयाकडून प्रसिद्ध करण्यात आलेल्या या आकडेवारीनुसार, बेळगाव जिल्ह्यात १८ लाख २५ हजार ५३१ पुरुष, १८ लाख १० हजार १७० महिला आणि तृतीयपंथी प्रवर्गातील १५९ मतदार आहेत. पुरुष आणि महिला मतदारांची संख्या जवळपास समान असल्याचेही या आकडेवारीतून स्पष्ट होते.
बंगळुरू अर्बनपेक्षा बेळगावमध्ये १२.३३ लाख मतदार अधिक
मतदारसंख्येच्या बाबतीत बेळगाव जिल्ह्याने मोठी आघाडी घेतली आहे. बंगळुरू अर्बन जिल्ह्यात २४ लाख १ हजार ९३९ मतदार असून, बेळगावमध्ये त्यापेक्षा १२ लाख ३३ हजार ९२१ मतदार अधिक आहेत. म्हैसूर जिल्हा २२ लाख ८० हजार ६७ मतदारांसह तिसऱ्या क्रमांकावर आहे.
SIR प्रक्रियेनंतर अंतिम यादी प्रसिद्ध
विशेष सखोल पुनरीक्षण प्रक्रियेंतर्गत घरोघरी जाऊन मतदारांची माहिती गोळा करणे, प्रारूप मतदार यादी प्रसिद्ध करणे, नागरिकांकडून दावे व हरकती स्वीकारणे आणि निवडणूक नोंदणी अधिकाऱ्यांकडून संबंधित प्रकरणांची पडताळणी करणे, अशा विविध टप्प्यांनंतर अंतिम मतदार यादी प्रसिद्ध करण्यात आली आहे.
या पार्श्वभूमीवर नागरिकांनी अंतिम मतदार यादीत आपले नाव, वैयक्तिक तपशील आणि मतदान केंद्राची माहिती तपासून घ्यावी, असे आवाहन करण्यात आले आहे.
निर्णयाविरोधात अपील करण्याची संधी
मतदार नोंदणी अधिकाऱ्यांच्या निर्णयामुळे बाधित झालेल्या नागरिकांना लोकप्रतिनिधित्व अधिनियम, १९५० च्या कलम २४ मधील तरतुदींनुसार निर्धारित कालमर्यादेत अपील करता येते. पहिल्या अपिलासाठी जिल्हाधिकाऱ्यांकडे, तर लागू तरतुदींनुसार दुसऱ्या अपिलासाठी मुख्य निवडणूक अधिकाऱ्यांकडे दाद मागता येते.
मतदारांना आवश्यक माहितीसाठी निवडणूक आयोगाच्या १९५० या हेल्पलाइन क्रमांकावर संपर्क साधता येईल.
मतदार ओळखपत्र आहे, म्हणजे नाव यादीत आहेच असे नाही!
केवळ मतदार ओळखपत्र (Voter ID) जवळ असल्याने संबंधित व्यक्तीचे नाव सध्याच्या मतदार यादीत असल्याची खात्री होत नाही. त्यामुळे प्रत्येक मतदाराने अंतिम यादीत आपले नाव, मतदान केंद्र आणि मतदार यादीतील अनुक्रमांक तपासणे महत्त्वाचे आहे.
अंतिम मतदार यादी प्रसिद्ध झाल्यानंतरही पात्र नागरिकांना नाव समाविष्ट करण्यासाठी अर्ज करता येतो. तसेच मतदारांच्या नोंदींमध्ये त्रुटी आढळल्यास निर्धारित प्रक्रियेनुसार दुरुस्ती करण्याची सुविधाही उपलब्ध आहे.
अंतिम मतदार यादी येथे तपासा आणि डाउनलोड करा :