बेळगाव लाईव्ह : जनस्नेही पोलीस प्रशासन, कार्यक्षम कार्यपद्धती आणि गंभीर गुन्ह्यांच्या तपासातील उल्लेखनीय कामगिरीच्या जोरावर माळमारुती पोलीस ठाण्याचे सीपीआय बी. आर. गड्डेकर यांना प्रतिष्ठेचे केंद्रीय गृहमंत्र्यांचे दक्षता पदक जाहीर झाले आहे. त्यांच्या कर्तव्यनिष्ठेचा आणि तपासातील व्यावसायिक कौशल्याचा हा राष्ट्रीय स्तरावरील गौरव आहे.
सीपीआय गड्डेकर यांनी अनेक गुंतागुंतीच्या आणि गंभीर गुन्ह्यांच्या तपासात महत्त्वपूर्ण भूमिका बजावली आहे. विशेषतः कोट्यवधी रुपयांच्या ठेवी गोळा करून ठेवीदारांची फसवणूक केल्याच्या प्रकरणात त्यांनी केलेला तपास उल्लेखनीय ठरला. पुराव्यांवर आधारित तपास पद्धती आणि व्यावसायिक दृष्टिकोनामुळे या प्रकरणाच्या तपासाला महत्त्व प्राप्त झाले.
तसेच, बेळगावात घडलेल्या एका खून प्रकरणात लक्ष्मण दड्डी टोळीच्या गुन्हेगारी कारवाया सिद्ध करण्यासाठी महत्त्वाचे पुरावे गोळा करण्यात त्यांनी पुढाकार घेतला. या प्रकरणात प्रभावी तपास आणि पुराव्यांच्या आधारे आरोपींना न्यायालयाकडून जन्मठेपेची शिक्षा सुनावण्यात आली. या निकालात तपासातील पुराव्यांची महत्त्वपूर्ण भूमिका राहिली.
गुन्हे उघडकीस आणणे आणि आरोपींना अटक करण्याबरोबरच सर्वसामान्य नागरिकांच्या समस्यांना तातडीने प्रतिसाद देणे, पोलीस ठाण्यात येणाऱ्या नागरिकांशी सौजन्याने वागणे आणि पोलिसांविषयी जनतेमध्ये विश्वास निर्माण करणे यावरही गड्डेकर यांनी भर दिला आहे. त्यांच्या जनस्नेही कार्यपद्धतीमुळे ते नागरिकांच्या विश्वासास पात्र ठरले आहेत.
कायदा व सुव्यवस्था राखणे, गुन्हेगारीवर नियंत्रण ठेवणे आणि पोलीस दलाची जबाबदारी निष्ठेने पार पाडणे या बाबींमध्ये त्यांनी दाखविलेल्या समर्पणाची दखल या पुरस्काराच्या माध्यमातून घेण्यात आली आहे.
विशेष म्हणजे, सीपीआय बी. आर. गड्डेकर यांना यापूर्वी राष्ट्रपती पदकानेही गौरविण्यात आले आहे. आता केंद्रीय गृहमंत्र्यांचे दक्षता पदक मिळाल्याने त्यांच्या शिरपेचात आणखी एक मानाचा तुरा रोवला गेला आहे.
त्यांच्या या यशाबद्दल पोलीस विभागातील वरिष्ठ अधिकारी, सहकारी कर्मचारी आणि नागरिकांकडून अभिनंदनाचा वर्षाव होत आहे.