हिरेबागेवाडी, हत्तरगी आणि कोगनोळी टोलनाक्यांवर अहोरात्र आंदोलन सुरूच; मागण्यांकडे दुर्लक्ष केल्यास आंदोलन तीव्र करण्याचा निर्धार
बेळगाव लाईव्ह : ऊसाला रास्त दर मिळावा, या मागणीसाठी शेतकरी संघटनांनी सुरू केलेले आंदोलन आता अधिक तीव्र होण्याची चिन्हे दिसत आहेत. हिरेबागेवाडी, हत्तरगी आणि कोगनोळी या तीन टोलनाक्यांवर शेतकऱ्यांनी अहोरात्र आंदोलन सुरू ठेवले असून, मागण्यांकडे सरकारने गांभीर्याने लक्ष न दिल्यास बेळगाव विमानतळ आणि रेल्वे स्टेशनही बंद करण्याचा इशारा शेतकरी नेते चन्नाप्पा पुजारी यांनी दिला आहे.
आंदोलनाच्या दुसऱ्या दिवशी माध्यमांशी संवाद साधताना चन्नाप्पा पुजारी यांनी सरकार आणि प्रशासनाला हा इशारा दिला. शेतकऱ्यांच्या प्रश्नांवर ठोस निर्णय घेण्याऐवजी त्यांच्याकडे दुर्लक्ष केले जात असल्याची भूमिका त्यांनी मांडली. शेतकऱ्यांच्या मागण्यांची दखल घेऊन ऊसदराचा प्रश्न मार्गी लावावा, अशी मागणीही त्यांनी केली.
उत्पादन खर्च वाढला, शेतकऱ्यांचे उत्पन्न मात्र अपुरे
शेतीसाठी लागणारे खत, डिझेल, पेट्रोल आणि इतर निविष्ठांच्या किमती वाढत असताना शेतमालाला अपेक्षित दर मिळत नसल्याची तक्रार आंदोलनकर्त्या शेतकऱ्यांनी केली आहे. भात, ज्वारी, नाचणी यांसारख्या पिकांबरोबरच ऊस उत्पादकांनाही रास्त दरासाठी संघर्ष करावा लागत असल्याचे शेतकरी नेत्यांचे म्हणणे आहे.
शेतकऱ्यांवरील कर्जाचा वाढता बोजा, उत्पादन खर्च आणि कुटुंबाचा उदरनिर्वाह यांसारख्या प्रश्नांकडे लक्ष वेधत शेतकऱ्यांना त्यांच्या कष्टाचा योग्य मोबदला मिळणे आवश्यक असल्याची भूमिका आंदोलकांनी मांडली.
मंगळवारचे आंदोलन बुधवारीही सुरूच
मंगळवारी सुरू झालेले आंदोलन बुधवारीही सुरू राहणार असून, मागण्यांवर ठोस तोडगा निघेपर्यंत आंदोलन मागे न घेण्याचा निर्धार शेतकऱ्यांनी व्यक्त केला आहे. हिरेबागेवाडी आणि हत्तरगीसह कोगनोळी टोलनाक्यावरही आंदोलन सुरू असल्याने महामार्गावरील वाहतुकीवर परिणाम होण्याची शक्यता आहे.
सरकारने ऊसदराच्या प्रश्नावर तातडीने तोडगा काढला नाही, तर आंदोलनाची व्याप्ती वाढविण्याचा इशारा शेतकरी नेत्यांनी दिला आहे. विमानतळ आणि रेल्वे स्टेशन बंद करण्याच्या इशाऱ्यामुळे प्रशासनासमोरील आव्हान वाढण्याची शक्यता असून, सरकार या आंदोलनावर कोणती भूमिका घेते, याकडे आता सर्वांचे लक्ष लागले आहे.
