बेळगाव लाईव्ह: ईडीच्या कारवाया प्रामुख्याने विरोधी पक्षातील नेत्यांवर होत असून, सत्ताधारी पक्षातील नेत्यांवर तुलनेने कमी कारवाया होत असल्याच्या आरोपांच्या पार्श्वभूमीवर मंत्री सतीश जारकीहोळी यांनी केलेल्या ‘आपल्याच लोकांचा षड्यंत्र आहे’ या वक्तव्यावर मंत्री लक्ष्मण सवदी यांनी सावध प्रतिक्रिया दिली.
रविवारी बेळगावातील काँग्रेस कार्यालयात पत्रकारांशी बोलताना सवदी म्हणाले की, जिल्हा पालकमंत्री सतीश जारकीहोळी यांनी कोणत्या अर्थाने हे वक्तव्य केले, याची आपल्याला माहिती नाही. त्यांनी केलेल्या वक्तव्याचे स्पष्टीकरण त्यांनीच द्यावे. या विषयावर मला विचारल्यास मी काय बोलू शकतो, असे सवदी यांनी स्पष्ट केले.
वाढत्या लोकसंख्येमुळे बंगळुरूत वाहतूक कोंडी
मुख्यमंत्री डी.के. शिवकुमार यांनी आमदारांना ‘दोन पत्नी’ असल्याच्या केलेल्या वक्तव्याबाबत विचारले असता, सवदी यांनी त्याचे समर्थन केले. बंगळुरूतील वाढती लोकसंख्या आणि शहरासमोरील विविध समस्यांच्या पार्श्वभूमीवर मुख्यमंत्र्यांनी हे वक्तव्य केले असल्याचे ते म्हणाले.
रोजगारासह विविध कारणांसाठी बंगळुरूत येणारे अनेक नागरिक तेथेच स्थायिक होत आहेत. त्यामुळे शहराची लोकसंख्या वाढत असून, वाहतूक कोंडी आणि प्रदूषणाची समस्याही वाढत आहे. या पार्श्वभूमीवर मुख्यमंत्री शिवकुमार यांनी ते वक्तव्य केल्याचे सवदी यांनी सांगितले.
भाजप नेत्यांकडून होत असलेल्या टीकेबाबत बोलताना सवदी यांनी, “कुंभाराचा चोर कोण असे विचारले असता स्वतःच खांद्याला हात लावल्यासारखे आहे. ज्यांनी काही चुकीचे केले असेल, त्यांनाच राग आला,” अशी उपरोधिक प्रतिक्रिया दिली.
नंदिनी दूध दरवाढीचा निर्णय लवकरच
नंदिनी दूध दरवाढीबाबत मुख्यमंत्री डी.के. शिवकुमार यांच्या अध्यक्षतेखाली बैठक झाली असून, पुढील चार-पाच दिवसांत नवीन दर निश्चित होण्याची शक्यता असल्याचे सवदी यांनी सांगितले.
दूध संघांनी प्रतिलिटर ८ ते १० रुपयांची दरवाढ करण्याची मागणी सरकारकडे केली आहे. मुख्यमंत्री या विषयाकडे गांभीर्याने पाहत असून, लवकरच दर निश्चित करण्याचे संकेत दिल्याचे सवदी म्हणाले.
दूध दर निश्चित करताना केवळ ग्राहकांचा विचार न करता दूध उत्पादक तसेच संबंधित संघ-संस्थांच्या हिताचाही विचार करणे आवश्यक आहे. सर्वांच्या हिताचा समतोल साधून अंतिम निर्णय घेतला जाईल, असे त्यांनी स्पष्ट केले.
साखरेसाठी स्वतंत्र दरव्यवस्थेची मागणी
ऊस दरवाढीच्या मागणीवर बोलताना सवदी यांनी केंद्र सरकारने एफआरपी आणि एमएसपी निश्चित करताना शेतकरी, ग्राहक तसेच साखर कारखान्यांच्या हिताचा विचार करावा, असे मत व्यक्त केले.
साखरेच्या दरासाठीही दोन प्रकारची व्यवस्था असावी, अशी मागणी त्यांनी केली. सामान्य ग्राहकांसाठी एक दर, तर सॉफ्ट ड्रिंक आणि स्वीट मार्टसारख्या व्यावसायिक कारणांसाठी साखर वापरणाऱ्यांसाठी स्वतंत्र दर असावा, असे त्यांनी सांगितले.
घरगुती आणि व्यावसायिक गॅससाठी ज्या पद्धतीने स्वतंत्र दर आहेत, त्याच धर्तीवर साखरेसाठीही दोन प्रकारचे दर निश्चित केल्यास संबंधित समस्यांवर तोडगा काढता येऊ शकतो. याबाबत केंद्र सरकारने गांभीर्याने विचार करावा, अशी मागणी सवदी यांनी केली.
