बेळगाव लाईव्ह : बेळगाव जिल्ह्यातील विविध तालुका आणि शहरांमधील बसस्थानकांमध्ये मूलभूत सुविधांचा अभाव असल्याचे चित्र आहे. स्वच्छ पिण्याचे पाणी, स्वच्छतागृहे, आसनव्यवस्था, पार्किंग आणि स्वच्छता या प्राथमिक सुविधांकडे दुर्लक्ष होत असल्याने प्रवाशांना गैरसोयींचा सामना करावा लागत आहे.
बेळगाव शहरातील मध्यवर्ती बसस्थानकाची परिस्थिती तुलनेने चांगली असली तरी रेल्वेस्थानकासमोरील बसस्थानकाकडे दुर्लक्ष झाले आहे. परिसरात कचरा पडलेला असून प्रवाशांसाठी बसविण्यात आलेली आसनेही तुटलेली आहेत.
सौंदत्तीतील नवीन बसस्थानकात सुविधांची कमतरता
सौंदत्ती येथे नवीन बसस्थानक उभारण्यात आले आहे. मात्र, येथे प्रवाशांसाठी पुरेशा सुविधा उपलब्ध नाहीत. पिण्याच्या पाण्याची योग्य व्यवस्था नसून महिलांचे विश्रांतीगृह, बालसंगोपन कक्ष आणि सामान ठेवण्याची खोली कुलूपबंद आहेत. जुना स्वच्छतागृह ब्लॉक वापराविना पडून असून परिसरात कचरा साचला आहे.
एम. के. हुबळीमध्ये बसस्थानकाची प्रतीक्षा
पुणे-बेंगळुरू राष्ट्रीय महामार्गावर असलेल्या एम. के. हुबळी येथे अद्याप योग्य बसस्थानकाची सुविधा नाही. प्रवाशांना रस्त्याच्या कडेला किंवा दुकानांसमोर बसची वाट पाहावी लागते. पावसाळ्यात मोडकळीस आलेल्या दुकानांचा आसरा घ्यावा लागतो.
मुनवळ्ळी बसस्थानकाचीही स्थिती समाधानकारक नाही. बसस्थानकाची जागा अपुरी असून प्रवाशांसाठी असलेली दगडी आसने चोरीला गेल्याचे सांगण्यात येते. रात्री प्रकाशाची व्यवस्था नसल्याने अडचणी वाढतात. बसस्थानकाजवळील नाला व्यवस्थित झाकलेला नसल्याने दुर्गंधी पसरते.
यारगट्टीत पाणी आणि आसनांची समस्या
अनेक तालुक्यांना जोडणाऱ्या यारगट्टी बसस्थानकात स्वच्छतागृहांची योग्य देखभाल होत नाही. पिण्याचे पाणी उपलब्ध नसून प्रवाशांसाठी पुरेशी आसनेही नाहीत. त्यामुळे गर्दीच्या वेळी प्रवाशांना उभे राहून बसची वाट पाहावी लागते.
“यारगट्टी बसस्थानकात नेहमी मोठी गर्दी असते. मात्र मूलभूत सुविधांचाही अभाव आहे. चोरीच्या घटना रोखण्यासाठी पोलिसांची नियुक्ती करावी,” अशी मागणी सामाजिक कार्यकर्ते चिदंबर कट्टिमनी यांनी केली.
रामदुर्गपासून हुक्केरीपर्यंत समस्याच
रामदुर्ग येथे नवीन आणि ग्रामीण अशी दोन बसस्थानके आहेत. मात्र दोन्ही ठिकाणी पिण्याच्या पाण्याची सुविधा नसल्याने प्रवाशांना जवळच्या हॉटेलवर अवलंबून राहावे लागते.
मुधोळी बसस्थानकात दुचाकी आणि चारचाकी वाहनांचे अस्ताव्यस्त पार्किंग होत असल्याने प्रवाशांना त्रास होतो. स्वच्छतागृहांची देखभाल न झाल्याने ती बंद आहेत. याचा विशेष त्रास महिला प्रवाशांना सहन करावा लागत आहे.
गोकाक येथील नवीन बसस्थानकाला महिला, ज्येष्ठ नागरिक आणि दिव्यांगांसाठी स्वतंत्र व सुविधायुक्त विश्रांतीगृहांची गरज आहे. बैलहोंगल बसस्थानकात स्वच्छता, पिण्याचे पाणी आणि बस प्लॅटफॉर्मबाबत समस्या आहेत. योग्य माहिती फलक नसल्याने प्रवाशांचा गोंधळ उडतो. हुक्केरी बसस्थानकातही पिण्याच्या पाण्याची सुविधा मर्यादित असून स्वच्छतागृहांच्या देखभालीची गरज आहे.
किट्टूरमध्ये बसस्थानकाचे व्यापारीकरण
कित्तूरमधील हेस्कॉम कार्यालयाजवळील मुख्य बसस्थानकात चांगल्या सुविधा आहेत. मात्र शहरातील जुन्या बसस्थानकाचा वापर आता मोठ्या प्रमाणात व्यावसायिक कारणांसाठी होत आहे. दुकानांनी बहुतांश जागा व्यापल्याने प्रवाशांना बसण्यासाठी जागा उपलब्ध होत नाही.
सार्वजनिक निधीतून उभारण्यात आलेल्या या बसस्थानकाचे उद्घाटन तत्कालीन मुख्यमंत्री वीरप्पा मोईली यांच्या हस्ते झाले होते. सुरुवातीला येथे केवळ हॉटेल आणि पान-विड्याचे दुकान होते. मात्र कालांतराने दुकानांनी संपूर्ण परिसर व्यापला.
2013 मध्ये तत्कालीन आमदार डी. बी. इनामदार यांच्या काळात बसस्थानकाच्या शेजारी बसशेड उभारण्यात आले होते. रस्ता रुंदीकरणाच्या कामात ते अलीकडे पाडण्यात आले. त्यामुळे प्रवाशांना आता दुकानांसमोरील ओट्यांचा आधार घ्यावा लागत आहे. काही दुकाने हटवून प्रवाशांसाठी आसनव्यवस्था करावी, अशी मागणी होत आहे.
खानापुरात नवीन बसस्थानक वापरात, मात्र उद्घाटन नाही
खानापूर येथे 2022 मध्ये नवीन बसस्थानक बांधण्यात आले असून ते सार्वजनिक वापरात आहे. मात्र अद्याप त्याचे अधिकृत उद्घाटन झालेले नाही. बसस्थानकाच्या भिंती आणि परिसरात पान-गुटख्याच्या पिचकाऱ्यांमुळे अस्वच्छता निर्माण झाली आहे.
अथणी बसस्थानकाजवळच स्वच्छतागृह असल्याने महिला प्रवाशांची गैरसोय होत आहे. लघुशंकेसाठी शुल्क आकारले जात असल्याबद्दलही प्रवाशांनी नाराजी व्यक्त केली आहे. पावसाळ्यात छताला गळती लागते. शहराचा विस्तार लक्षात घेता अथणी येथे स्वतंत्र शहर बसस्थानक उभारावे, अशी नागरिकांची मागणी आहे.
दरम्यान, बेळगाव परिवहन महामंडळाचे विभागीय नियंत्रक शशिधर एम. व्ही. यांनी बेळगाव विभागातील सर्व बसस्थानकांमध्ये आवश्यक सुविधा उपलब्ध करून देण्यासह प्रवाशांच्या समस्या सोडविण्याचे आश्वासन दिले आहे.
