बेळगाव लाईव्ह : पावसाळ्यात जुनाट आणि जीर्ण झालेली झाडे तसेच त्यांच्या वाळलेल्या फांद्या कोसळून दुर्घटना होण्याची शक्यता वाढली आहे. त्यामुळे संभाव्य अपघात टाळण्यासाठी बेळगाव शहरातील विविध रस्त्यांवर असलेल्या जुनाट वृक्षांच्या वाळलेल्या व धोकादायक फांद्या तातडीने तोडाव्यात, अशी मागणी अॅडव्होकेट मारुती कामाणाचे यांनी केली आहे.
पावसाळ्यात जोरदार वारा आणि मुसळधार पावसामुळे झाडांच्या फांद्या तुटून रस्त्यावर पडण्याच्या घटना घडतात. अशा घटना वाहनचालक, पादचारी तसेच परिसरातील नागरिकांसाठी धोकादायक ठरू शकतात. त्यामुळे दुर्घटना घडल्यानंतर उपाययोजना करण्याऐवजी प्रशासनाने आधीच धोकादायक झाडे आणि फांद्यांची पाहणी करून आवश्यक कार्यवाही करावी, असे कामाणाचे यांनी म्हटले आहे.
महापालिका-वन विभागाने संयुक्तपणे झाडांचे ऑडिट करावे
बेळगाव शहरातील सर्व जुनाट, जीर्ण आणि मोठ्या वृक्षांचे ऑडिट करण्यात यावे. कोणती झाडे धोकादायक स्थितीत आहेत, कोणत्या झाडांच्या फांद्या वाळलेल्या आहेत आणि कोणती झाडे पावसाळ्यात किंवा जोरदार वाऱ्यात कोसळण्याची शक्यता आहे, याची पाहणी करणे आवश्यक आहे.
यासाठी बेळगाव महापालिका आणि वन विभागाने संयुक्तपणे शहरातील प्रमुख रस्ते, चौक आणि वर्दळीच्या ठिकाणी असलेल्या झाडांची पाहणी करून धोकादायक झाडे व फांद्यांवर तातडीने कार्यवाही करावी, अशी मागणी करण्यात आली आहे.
आरटीओ-अशोक स्तंभ रोडवर धोकादायक झाड
विशेषतः आरटीओ ते अशोक स्तंभ रोड परिसरात, कसबेकर मेटगुड दवाखाना/हॉस्पिटललगतच्या रस्त्यावर एक झाड पूर्णपणे वाळलेल्या अवस्थेत असल्याचे निदर्शनास आणून देण्यात आले आहे. या ठिकाणी वाहनांची आणि नागरिकांची मोठी वर्दळ असल्याने हे झाड कोसळल्यास गंभीर दुर्घटना होण्याची शक्यता आहे.
तसेच याच परिसरातील पेट्रोल पंपाजवळील एका झाडाची मोठी फांदी रस्त्यावर पडण्याची शक्यता असल्याचेही सांगण्यात आले आहे. पेट्रोल पंप आणि मुख्य रस्त्यालगतचा हा परिसर असल्याने संबंधित यंत्रणांनी तातडीने पाहणी करून आवश्यक ती कार्यवाही करणे गरजेचे आहे.
दुर्घटना होण्यापूर्वीच उपाययोजना करण्याची गरज
शहरातील प्रमुख रस्त्यांवर दिवसभर वाहनांची आणि पादचाऱ्यांची मोठी वर्दळ असते. अशा ठिकाणी झाड किंवा मोठी फांदी अचानक कोसळल्यास जीवितहानी तसेच वाहनांचे नुकसान होण्याची शक्यता नाकारता येत नाही.
त्यामुळे प्रशासनाने केवळ तक्रार आल्यानंतर कारवाई करण्याऐवजी पावसाळ्याच्या पार्श्वभूमीवर शहरातील सर्व जुनाट आणि धोकादायक झाडांचे ऑडिट करून त्यांची नियमित पाहणी करावी, तसेच वाळलेल्या व धोकादायक फांद्यांची छाटणी करावी, अशी मागणी अॅडव्होकेट मारुती कामाणाचे यांनी केली आहे.
आरटीओ-अशोक स्तंभ रोडवरील वाळलेले झाड आणि पेट्रोल पंपाजवळील धोकादायक फांदीची तातडीने पाहणी करून आवश्यक असल्यास झाड हटवावे किंवा धोकादायक फांद्या तोडाव्यात, अशी मागणीही त्यांनी केली आहे.
पावसाळ्यात नागरिकांच्या सुरक्षिततेच्या दृष्टीने महापालिका आणि वन विभागाने या मागणीची गांभीर्याने दखल घेऊन शहरातील जुनाट व धोकादायक झाडांचे ऑडिट करून तातडीने प्रतिबंधात्मक कार्यवाही करणे आवश्यक आहे.
