बेळगाव लाईव्ह : बेळगाव येथील उपनोंदणी कार्यालयात बनावट आयजीपीए (Irrevocable General Power of Attorney) तयार करून फसवणुकीच्या माध्यमातून मालमत्तेची नोंदणी केल्याप्रकरणी सहभागी असलेल्या दोन आरोपींना मार्केट पोलिसांनी अटक केली आहे.
अटक करण्यात आलेल्या आरोपींची नावे पुढीलप्रमाणे आहेत :
- इस्लाक इस्माईल मुजावर
- नागराज रामचंद्र कडकोळ
मार्केट पोलीस ठाण्याने दिलेल्या माहितीनुसार, ४ जानेवारी २०२५ रोजी कडोली (ता. व जि. बेळगाव) येथील परशुराम देवप्पा दुदूम (वय ६६) यांनी दिलेल्या फिर्यादीवरून मार्केट पोलीस ठाणे गुन्हा क्रमांक ०२/२०२५ अंतर्गत भारतीय दंड संहितेच्या कलम ४२०, ४६४, ४६५, ४६७, ४६८, ४७१, ४१९ तसेच १४९ अन्वये गुन्हा दाखल करून तपास सुरू करण्यात आला होता.
तपासादरम्यान तक्रारदाराची मालमत्ता बळकावण्याच्या उद्देशाने एका व्यक्तीने तक्रारदाराचे बनावट रूप धारण केले. त्याचा फोटो आणि बनावट स्वाक्षरीचा वापर करून बनावट आयजीपीए तयार करण्यात आला. त्यानंतर या बनावट कागदपत्रांच्या आधारे उपनोंदणी कार्यालयात संबंधित मालमत्तेची नोंदणी करून फसवणूक करण्यात आल्याचे तपासात उघड झाले.
या प्रकरणात आयजीपीएवरील बनावट व्यक्तीच्या छायाचित्राच्या आधारे पोलिसांनी तपासाची दिशा निश्चित केली. त्यानंतर इस्लाक इस्माईल मुजावर (वय ४३, रा. न्यू आझाद नगर, बेळगाव) याला अटक करण्यात आली.
तसेच या गुन्ह्यात सहकार्य करणारा व फरार असलेला नागराज रामचंद्र कडकोळ (वय ४१, व्यवसाय – रिअल इस्टेट, रा. देवराज अरस कॉलनी, बसवण कुडची, सांब्रा, बेळगाव) यालाही १८ जुलै २०२६ रोजी अटक करण्यात आली. दोन्ही आरोपींना न्यायालयासमोर हजर करण्यात आले असून न्यायालयीन कोठडी सुनावण्यात आली आहे.
दरम्यान, आरोपी नागराज रामचंद्र कडकोळ याच्याविरुद्ध उत्तर कन्नड जिल्ह्यात गुन्हा क्रमांक ६४/२०२६ (बीएनएस-२०२३ अंतर्गत कलम १२६(२), १८९(२), ११८(१), १०९ सह कलम १९०) नोंद असल्याची माहिती पोलिसांनी दिली. या प्रकरणात तो यापूर्वी कारवार कारागृहातून जामिनावर सुटलेला असल्याचेही तपासात समोर आले आहे.
ही कारवाई मार्केट पोलीस ठाण्याचे पोलीस निरीक्षक जे. एम. कालिमिर्ची, पीएसआय एच. एल. केरूर आणि त्यांच्या पथकाने केली. या उल्लेखनीय कामगिरीबद्दल बेळगाव शहराचे पोलीस आयुक्त यांनी संबंधित पोलिसांचे कौतुक केले आहे.
