बेळगाव लाईव्ह : डिसेंबर २०२६ मध्ये होणाऱ्या सेंट पॉल्स हायस्कूल, कॅम्प, बेळगावच्या ऐतिहासिक १७० व्या वर्धापन दिन सोहळ्यास कर्नाटकचे मुख्यमंत्री डी के शिवकुमार यांनी प्रमुख उपस्थिती दर्शविण्यास सहमती दर्शविली आहे.
या पार्श्वभूमीवर शाळेचे प्राचार्य रेव्ह. फा. एरिक मथायस, एस.जे. आणि फा. डॅनियल फर्नांडिस यांनी मंगळवारी डी. के. शिवकुमार यांची भेट घेऊन वर्धापन दिन सोहळ्याचे औपचारिक निमंत्रण दिले.
यावेळी प्राचार्य फा. एरिक मथायस यांनी संस्थेच्या १७० वर्षांच्या गौरवशाली शैक्षणिक प्रवासाची माहिती दिली. जेसुइट परंपरेनुसार “इतरांसाठी जगणारे स्त्री-पुरुष” घडविण्याच्या ध्येयाने सेंट पॉल्स हायस्कूलने कर्नाटकासह देशभरातील विविध क्षेत्रांत उल्लेखनीय योगदान देणाऱ्या विद्यार्थ्यांच्या अनेक पिढ्या घडवल्याचे त्यांनी सांगितले.
डी. के. शिवकुमार यांनी निमंत्रण आनंदाने स्वीकारत सेंट पॉल्स हायस्कूलने गेल्या १७० वर्षांपासून दर्जेदार शिक्षण, चारित्र्यनिर्मिती आणि समाजघडणीसाठी केलेल्या सातत्यपूर्ण कार्याचे कौतुक केले. संस्थेने समाजाच्या जडणघडणीत बजावलेल्या महत्त्वपूर्ण भूमिकेची प्रशंसा करत त्यांनी वर्धापन दिन सोहळ्यास शुभेच्छा दिल्या.
ही भेट शैक्षणिक उत्कृष्टता, सामाजिक मूल्ये आणि राष्ट्रनिर्मितीच्या कार्यासाठी कटिबद्ध असलेल्या संस्थांप्रती असलेली समान बांधिलकी अधोरेखित करणारी ठरली.
डिसेंबरमध्ये होणाऱ्या या ऐतिहासिक सोहळ्यात संस्थेचे माजी विद्यार्थी, शिक्षणतज्ज्ञ, विद्यार्थी, लोकप्रतिनिधी आणि हितचिंतक मोठ्या संख्येने सहभागी होण्याची अपेक्षा आहे. या निमित्ताने उत्तर कर्नाटकातील प्रतिष्ठित शैक्षणिक संस्थांपैकी एक असलेल्या सेंट पॉल्स हायस्कूलच्या समृद्ध वारशाला आणि दीर्घकालीन योगदानाला अभिवादन करण्यात येणार आहे.
