बेळगाव लाईव्ह : बेळगावचे ‘पतंग मॅन’ म्हणून ओळखले जाणारे संदेश कड्डी यांना इंडोनेशियातील बाली येथे होणाऱ्या प्रतिष्ठित आंगोन आंतरराष्ट्रीय पतंग महोत्सवात (Angon International Kite Festival) सहभागी होण्यासाठी निमंत्रण मिळाले आहे. हा महोत्सव २३ ते २७ एप्रिल दरम्यान डेन्पासार, बाली येथे होणार आहे.
रोटरी क्लब ऑफ बेळगाव (डिस्ट्रिक्ट ३१७०) चे सदस्य तसेच रोटरी इंटरनॅशनल फेलोशिप ऑफ काइट्सचे अध्यक्ष असलेले संदेश कड्डी या महोत्सवात भारताचे प्रतिनिधित्व करणार आहेत. यावेळी ते आपल्या नव्या पतंगाच्या डिझाइनचे अनावरण करणार असून, विविध देशांतील पतंग कलाकारांसमवेत भारतीय पतंगकलेचे वैशिष्ट्य जगासमोर मांडणार आहेत.
गेली १५ वर्षे पतंगनिर्मिती आणि पतंग उडविण्याच्या कलेच्या जतन व प्रसारासाठी कार्यरत असलेल्या संदेश कड्डी यांना त्यांच्या कार्याची दखल घेत पंतप्रधान नरेंद्र मोदी यांनीही गौरविले आहे. आतापर्यंत त्यांनी २० हून अधिक देशांतील आंतरराष्ट्रीय पतंग महोत्सवांमध्ये भारताचे प्रतिनिधित्व करत तिरंगा फडकावला असून, सांस्कृतिक दूत म्हणूनही त्यांनी ओळख निर्माण केली आहे.
अलीकडेच त्यांची रोटरी इंटरनॅशनल फेलोशिप ऑफ काइट्सच्या अध्यक्षपदी सलग दुसऱ्या कार्यकाळासाठी निवड झाली आहे. त्यानंतर लगेचच बालीतील या प्रतिष्ठित महोत्सवाचे निमंत्रण मिळाल्याने बेळगाव, रोटरी परिवार आणि भारतीय पतंग समुदायासाठी हा अभिमानाचा क्षण ठरला आहे.
पतंग उडविण्याच्या माध्यमातून संस्कृती, शांतता, ऐक्य आणि जागतिक मैत्रीचा संदेश देणारे संदेश कड्डी भारतीय पतंगकलेला जागतिक स्तरावर नवी उंची मिळवून देत आहेत.
