बेळगाव लाईव्ह : कर्नाटक राज्य नैसर्गिक आपत्ती नियंत्रण केंद्राने बेळगाव जिल्ह्यातील ७ जुलै २०२६ पर्यंतच्या पाऊसमानाची अधिकृत आकडेवारी जाहीर केली आहे. या अहवालानुसार जिल्ह्यात मान्सूनचा जोर कायम असून गेल्या २४ तासांत बहुतांश तालुक्यांमध्ये सरासरीपेक्षा अधिक पाऊस नोंदवला गेला आहे.
या अहवालानुसार, गेल्या २४ तासांत खानापूर तालुक्यात सर्वाधिक ७४ मिमी पावसाची नोंद झाली असून येथील सरासरी २४ मिमी इतकी होती. त्याखालोखाल बैलहोंगल तालुक्यात २०.४ मिमी पाऊस झाला आहे,
जिथे सामान्यतः ६.५ मिमी पावसाची अपेक्षा असते. बेळगाव तालुक्यात ४६.३ मिमी, कित्तूरमध्ये ३१ मिमी तर निपाणी तालुक्यात १६.२ मिमी पाऊस पडला आहे. ७ जुलै रोजी सकाळी ८.३० वाजेपर्यंत संपलेल्या २४ तासांत जिल्ह्यातील अनेक भागांत पावसाचा चांगला प्रभाव दिसून आला.
चालू जुलै महिन्याच्या पहिल्या आठवड्याचा (१ जुलै ते ७ जुलै) विचार केला असता, हुक्केरी तालुक्यात सरासरी २९ मिमी ऐवजी तब्बल १०१ मिमी पावसाची नोंद झाली आहे. निपाणी तालुक्यात सरासरी ३८ मिमीच्या तुलनेत १३९ मिमी पाऊस झाला असून अथणी तालुक्यात २३ मिमी पाऊस पडला आहे.
१ जून ते ७ जुलै या नैऋत्य मान्सूनच्या एकूण कालावधीत चिक्कोडी तालुक्यात सरासरी १२५ मिमी ऐवजी १९२ मिमी आणि गोकाक तालुक्यात सरासरी ९१ मिमी ऐवजी १०२ मिमी पावसाची नोंद झाली आहे. एकूणच बेळगाव जिल्ह्यात यंदा मान्सूनचे प्रमाण समाधानकारक असल्याचे या आकडेवारीवरून स्पष्ट होते.