बेळगाव लाईव्ह : मोबाईलवर आलेला एक फोन आणि त्यानंतर सुरू झालेली भीतीची मालिका… वयाच्या 83 व्या वर्षी आयुष्यभराची पुंजी डोळ्यांसमोर निसटून जाईल, याची कल्पनाही भाग्यनगर येथील विजयाबाई उप्पीन यांना नव्हती. मात्र स्वतःला दिल्ली हायकोर्टातील न्यायाधीश आणि तपास अधिकारी म्हणवून घेणाऱ्या सायबर भामट्यांनी त्यांना अशा जाळ्यात अडकवले की अखेरीस त्यांना 15 लाख रुपयांचा फटका बसला.
सायबर गुन्हेगारांनी विजयाबाईंना फोन करून त्यांच्यावर गंभीर गुन्हा दाखल असल्याचे सांगितले. “तुमच्यावर चौकशी सुरू आहे, सहकार्य केले नाही तर अटक होऊ शकते,” अशा प्रकारच्या धमक्या देत त्यांनी वृद्ध महिलेला मानसिकदृष्ट्या खचवण्यास सुरुवात केली. कायद्याचा आदर करणाऱ्या आणि न्यायालयाचे नाव ऐकून घाबरलेल्या विजयाबाईंनी या फोनकडे दुर्लक्ष करण्याऐवजी त्यावर विश्वास ठेवला.
यानंतर सुरू झाला “डिजिटल अटकेचा” प्रकार. तब्बल दहा दिवस आरोपींनी त्यांना सतत व्हिडिओ कॉलवर ठेवले. घरात काय चालले आहे, कोण भेटायला येते, त्या कुठे जातात, कोणाशी बोलतात यावरही नजर ठेवली जात होती. चौकशीच्या नावाखाली त्यांना सतत संपर्कात राहण्यास भाग पाडले गेले.
या काळात आरोपींनी त्यांच्या बँक खात्यांची, मुदत ठेवींची (एफडी), बचत खात्यांची तसेच घरातील दागिन्यांची माहिती मिळवली. “तुमच्या खात्यांची पडताळणी करावी लागेल”, “पैसे सुरक्षित खात्यात हलवावे लागतील”, “तपास पूर्ण झाल्यावर रक्कम परत मिळेल” अशा सबबी सांगत त्यांनी विजयाबाईंचा विश्वास जिंकला.
भीती आणि गोंधळाच्या वातावरणात विजयाबाईंनी बँकेतील एफडी मोडल्या. आयुष्यभराच्या बचतीतून जमा झालेली रक्कम त्यांनी 9 एप्रिल रोजी आरोपींनी सांगितलेल्या खात्यावर वर्ग केली. एक-दोन लाख नव्हे, तर तब्बल 15 लाख रुपये त्यांनी स्वतःच्या हाताने पाठवले.
धक्कादायक बाब म्हणजे पैसे गेल्यानंतरही आरोपी काही दिवस संपर्कात राहिले. त्यामुळे विजयाबाईंना संशय आला नाही. मात्र नंतर अचानक संपर्क तुटल्याने कुटुंबीयांना शंका आली. त्यांनी संपूर्ण प्रकाराची माहिती घेतली असता हा सायबर फसवणुकीचा प्रकार असल्याचे स्पष्ट झाले.
यानंतर शहर सायबर गुन्हे पोलिस ठाण्यात तक्रार दाखल करण्यात आली. पोलिसांनी गुन्हा नोंदवून तपास सुरू केला असून संबंधित खात्यांचा आणि फोन नंबरचा माग काढण्याचे प्रयत्न सुरू आहेत.
आजच्या डिजिटल युगात सायबर गुन्हेगार केवळ तांत्रिक फसवणूक करत नाहीत, तर माणसांच्या भीतीचा, विश्वासाचा आणि एकटेपणाचाही गैरफायदा घेत आहेत. विजयाबाईंची घटना ही केवळ 15 लाखांच्या फसवणुकीची नाही, तर एका ज्येष्ठ नागरिकाच्या विश्वासावर झालेल्या आघाताची कहाणी आहे.